«Matematikadan o‘zlashtirish Toshkent shahrida atigi 13 foizni tashkil etadi». Bosh vazir o‘rinbosariga so‘rovnoma yuboriladi

28 fevral kuni o‘z ish faoliyatini boshlagan Senat yalpi majlisi yig‘ilishida rais Nig‘matilla Yo‘ldoshev maktab darsliklarini tayyorlanishini tanqid qildi. Bu haqda Kun.uz muxbiri xabar bermoqda.

Shuningdek, Senat raisi maktab o‘quvchilarining davlat tili, ona tilini yaxshi bilmasligini ta'kidladi. Masalan, 8-sinf o‘quvchilarining ona tilidan o‘zlashtirish darajasi mamlakat bo‘yicha 72 foiz, 9-sinf o‘quvchilarining matematikadan o‘zlashtirishi esa 54 foizni tashkil etishi ma'lum qilindi.

«Ayniqsa, ona tilidan o‘zlashtirish Toshkent shahrida 58 foizni, Namangan viloyatida 32 foizni, matematikadan o‘zlashtirish Qoraqalpog‘istonda 26 foiz, Namangan viloyatida 23 foiz, Toshkent shahrida bor-yo‘g‘i 13 foizni tashkil etgani tashvishli holdir», - deya ta'kidlagan rais.

Parlament ta'lim sifati, pirovardida butun millat kelajagiga daxldor bo‘lgan mazkur masalalar va muammolar ko‘lami g‘oyat kengligi, ular yuzasidan mas'ul vazirlik va idoralar,olim va amaliyotchilar, ekspertlar, qolaversa, keng jamoatchilik munosabati muhim ekanligini inobatga olib, umumta'lim maktablari darsliklarini tayyorlashning bugungi holati yuzasidan bir qator savollar bayon etilgan parlament so‘rovini Bosh vazir o‘rinbosariga yo‘llashni lozim topdi.

Eslatib o‘tamiz, bundan avval Senatda ayrim maktab darsliklari marhum shaxslar muallifligida chop etilayotgani, boshqa tilda ta'lim beriladigan maktablarda davlat tiliga kam e'tibor qilinishi haqida mulohazalar bildirilgandi.