Senat: 2019 yilda 112,2 trln. so‘mlik investitsiyalar o‘zlashtirilishi kutilmoqda

2019 yilgi investitsiya dasturi asosida barcha manbalar hisobidan 112,2 trln. so‘mlikdan ziyod yoki 2018 yilga nisbatan 16 foiz ko‘p investitsiyalarni o‘zlashtirish mo‘ljallanmoqda, deb xabar bermoqda Senat yalpi majlisida ishtirok etayotgan Kun.uz muxbiri.

28 fevral kuni o‘z ishini boshlagan Oliy Majlis Senatining XVIII-yalpi majlisida mazkur kapital qo‘yilmalarining 34 trln. so‘mlikdan ko‘prog‘i to‘g‘ridan-to‘g‘ri xorijiy investitsiya ekanligi ma'lum qilindi.

Senat raisi Nig‘matilla Yo‘ldoshevning ta'kidlashicha, 2019 yilning «Faol investitsiyalar va ijtimoiy rivojlanish yili» deb nomlanishi zamirida ham ana shu vazifa bajarilishini so‘zsiz ta'minlash maqsadi yotibdi.

«Qolaversa, mamlakatimiz yil boshidayoq ushbu yo‘nalishdagi olamshumul yutuqqa erishib, o‘zining moliyaviy tarixidagi yangi sahifasini ochdi: 13 fevral kuni O‘zbekiston ilk bor1 mlrd. dollarlik davlat obligatsiyalarini London fond birjasiga muvaffaqiyatli joylashtirdi. Natijada mamlakatimizning davlat xalqaro yevrobondlariga talab 8 mlrd. dollardan oshib ketdi», - deb fikr bildirdi rais.

Eslatib o‘tamiz, 2019-2021 yillar davomida O‘zbekistonda umumiy qiymati 1,5 mlrd. dollarga teng 800ga yaqin loyihalar amalga oshirilishi kutilmoqda. Davlat rahbari 2019 yil 1 yanvarga qadar muddatda investitsiya kiritish uchun eng qulay sharoitlar yaratishga qaratilgan, investitsiya faoliyati sohasidagi unifikatsiya qilingan qonun hujjati loyihasini ishlab chiqish va kiritish vazifasini topshirgandi.

Shunga monand, O‘zbekistonda «Investitsiyalar va investitsiya faoliyati to‘g‘risida»gi qonun ishlab chiqildi.