O‘zbekiston va BAA o‘rtasida muzokaralar bo‘lib o‘tdi

2019 yilning 1 mart kuni Islom hamkorlik tashkiloti Tashqi ishlar vazirlari kengashining (IHT TIVK) 46-sessiyasida ishtirok etayotgan O‘zbekiston Respublikasi tashqi ishlar vaziri Abdulaziz Komilov boshchiligidagi delegatsiya Abu-Dabi shahrida Birlashgan Arab Amirliklari tashqi ishlar va xalqaro hamkorlik vaziri Shayx Abdulla bin Zoid Ol Nahayon bilan uchrashuv o‘tkazdi.

O‘zbekiston TIV rahbari vazir Shayx Abdulla bin Zoid Ol Nahayonni IHT TIVKdagi raisligi boshlangani bilan tabriklab, unga tashkilotga a'zo davlatlarning xalqlari farovonligi yo‘lidagi faoliyatida omad tiladi, deyiladi Tashqi ishlar vazirligi xabarida.

Bo‘lib o‘tgan suhbat chog‘ida ikki tomonlama munosabatlarning hamda BMT, IHT va boshqa xalqaro va mintaqaviy tuzilmalar doirasidagi hamkorlikning hozirgi holati va rivojlanish istiqbollari muhokama qilindi.

Vazirlar siyosiy, savdo-iqtisodiy, investitsiya, turizm, madaniy-gumanitar va boshqa sohalardagi hamkorlik hajmlarini oshirishga o‘zaro qiziqish borligini va buning uchun sezilarli salohiyat mavjudligini tasdiqladilar. Xususan, 2018 yilda O‘zbekiston va BAA o‘rtasidagi o‘zaro savdo aylanmasi o‘tgan yilga nisbatan 23%ga o‘sdi va ushbu dinamika joriy yilda ham saqlanib qolishi kutilmoqda.

Turli darajadagi bo‘lajak ikki tomonlama uchrashuvlarning muddati va kun tartibi borasidagi tomonlarning takliflari muhokamasi muzokaralarda alohida o‘rin oldi.