Belarus prezidenti Aleksandr Lukashenko Rossiya bilan integratsiyaga yondashuvlarni qayta ko‘rib chiqishga tayyorligi haqida ma'lum qildi. Bu haqda u Yevropa tashkilotlari bilan hamkorlik va integratsiya tuzilmalarida ishtirok etish masalalari bo‘yicha yig‘ilishda xabar berdi, deya ma'lumot tarqatdi BeLTA.
«Belarus ittifoq qurish g‘oyasining mutlaq tarafdori bo‘lib qoladi. Men buni Rossiya Federatsiyasidagi tarafdorlarimiz hamda raqiblarimiz eshitishini xohlayman», - dedi Belarus yetakchisi.
Uning ta'kidlashicha, ittifoqning asosiy tamoyili - barcha fuqarolar uchun teng sharoitlar va suverenitet postulati (isbotsiz ham qabul qilinaveradigan dastlabki faraz - tah.).
Uning so‘zlariga ko‘ra, Rossiya rahbariyati bundan avval integratsiyaga yondashuvlarni qayta ko‘rib chiqish tashabbusi bilan chiqqan. «Biz bunga tayyormiz. Hukumatlar darajasida guruhlar tashkil etildi, bu ikkilik doirasida birlashuv jarayonlarini yanada rivojlantirish bo‘yicha takliflar tayyorlash uchun qilindi», - deya aniqlik kiritdi Lukashenko.
Uning qo‘shimcha qilishicha, birgalikdagi ishni tahlil qilish va «foydalanilmayotgan resurslar mavjud bo‘lgan joylarni» aniqlash kerak. Shuningdek, Belarus prezidentining qayd etishicha, ikki tomonlama hamkorlikning eng dolzarb muammolari hozirgi vaqtda iqtisodiy sohadadir.
Moskva va Minsk o‘rtasida neft-gaz sohasidagi bahs o‘tgan yilning oxirida keskinlashdi, o‘shanda Lukashenko Rossiyada tayyorlanayotgan soliq manyovrini integratsiyani to‘xtatishga urinish deb atadi: u tufayli Rossiya nefti Belarusga Yevropa narxlarida yetkazib berilishi lozim.
So‘nggi bir necha oy ichida Lukashenko bir necha bor respublikaning mustaqilligi va suvereniteti masalasi haqida gapirdi. O‘tgan yil dekabrida u Belarus hech qachon Rossiya tarkibiga kirmasligi haqida ma'lum qildi. Kremldan ta'kidlashlaricha, masala bunday shaklda muhokama etilmagan.
O‘shanda Belarus OAV davlat suverenitetini himoya qilish bo‘yicha mamlakat isteblishmenti yopiq majlis o‘tkazganini xabar berdi. Davlat rahbarining matbuot kotibi bunday ma'lumotni rad etib, Belarusda mustaqillik masalasi «allaqachon hal etilgani»ni ta'kidladi.
2019 yil boshida u Belarusga G‘arb va Sharqdan tahdid borligi haqida ogohlantirgandi. Uning so‘zlariga ko‘ra, respublika «ham chapda, ham o‘ngda, ham G‘arbdan, ham Sharqdan suverenitet va mustaqillik masalasi bo‘yicha jiddiy ravishda tekshiriladi». Shu bilan birga, Lukashenkoning qayd etishicha, agar hukumat samarali ishlasa, mamlakatni «o‘rnidan qo‘zg‘ata olishmaydi».
Bundan oldin, Lukashenko Putinning rejasi va prezidentlikdan «to‘ygani» haqida gapirgandi.
