Investorlarga yangi mehmonxonani qurish va jihozlash uchun davlat budjetidan subsidiyalar ajratiladi
|21:44 / 06.03.20194 0679 min
Foto: ShutterstockFoto: Shutterstock
Normativ-huquqiy hujjatlar loyihalari muhokamasi portalida Vazirlar Mahkamasining “Yangi mehmonxonani qurish va jihozlash uchun investorlarga subsidiya ajratish hamda tashkilotlarni franchayzing to‘g‘risidagi shartnoma asosida qisman moliyalashtirish uchun Davlat budjetidan mablag‘ ajratish tartibi to‘g‘risidagi nizomni tasdiqlash to‘g‘risida”gi qarori loyihasi joylashtirildi.
Nizomga ko‘ra, investorlar tomonidan mehmonxona toifasi tasdiqlangach yangi mehmonxonani qurish va jihozlash uchun investorlar xarajatlarining bir qismi subsidiya hisobidan qoplanadi.
Bunda subsidiya ajratish uchun mehmonxona 2022 yil 1 yanvargacha foydalanishga topshirilgan bo‘lishi lozim.
Investorlar xarajatlarining bir qismini Davlat budjetidan moliyalashtirish miqdori nizom kuchga kirgan vaqtdan boshlab qo‘shimcha ravishda yangidan tashkil etilayotgan mehmonxona xonalari soni 50 mingtaga yetguniga qadar amal qiladi. O‘zbekiston Respublikasi Turizmni rivojlantirish davlat qo‘mitasi har chorak yakuni bilan qo‘shimcha ravishda yangidan tashkil etilayotgan mehmonxona xonalari hisobini yuritadi va Moliya vazirligiga taqdim etadi.
Investorlar va tashkilotlar Davlat budjetidan subsidiya olishi yoki qisman moliyalashtirilishi uchun quyidagi talablarga javob berishi shart:
O‘zbekiston Respublikasi Soliq kodeksida nazarda tutilgan soliq va boshqa majburiy to‘lovlar bo‘yicha qarzi bo‘lmagan;
qayta tashkil qilish, bankrotlik va tugatish jarayonida bo‘lmagan;
Davlat budjetidan me'yoriy-huquqiy hujjatlar asosida moliyaviy ta'minot va xarajatlarni qoplash maqsadlariga mablag‘ jalb qilmagan.
Subsidiyalar investorlarga yangidan qurilgan mehmonxona quyidagi talablarga javob berganda ajratiladi:
kamida 3 yulduzli toifa uchun 50 ta xonadan kam bo‘lmagan xonalar fondiga ega mehmonxona;
kamida 4 yulduzli toifa uchun 100 ta xonadan kam bo‘lmagan xonalar fondiga ega mehmonxona.
Subsidiyalar Qo‘mita tomonidan mehmonxona toifasi tasdiqlangach quyidagi miqdorlarda bir marotaba:
kamida 3 yulduzli toifa hamda 50 va undan ko‘p xonalarga ega mehmonxonalardagi har bir xona uchun 40 million so‘m;
kamida 4 yulduzli toifaga hamda 100 va undan ko‘p xonalar ega mehmonxonalardagi har bir xona uchun 65 million so‘mdan ajratiladi.
Mavzuga oid
Kelgusi yil uchun Davlat budjeti parametrlarini tasdiqlash jarayonida yuqoridagi miqdorlar har yili indeksatsiya qilgan holda amalga oshiriladi.
Investorlar subsidiyalar ajratilishi uchun Qo‘mitaga belgilangan tartibda ariza bilan murojaat qiladi.
Arizaga quyidagi hujjatlar ilova qilinadi:
ariza beruvchining – yuridik shaxs bo‘lgan investorning nomi, joylashgan yeri (pochta manzili), STIR va tijorat bankidagi hisobraqamlar rekvizitlari;
yangi qurilgan mehmonxonaning kadastr hujjatlarining nusxasi;
qo‘mita huzuridagi “Turizm xizmatlarini sertifikatlash markazi” DUK tomonidan taqdim etilgan muvofiqlik sertifikati hamda yangi qurilgan mehmonxonaning 3 yoki 4 yulduzli mehmonxona toifasini tasdiqlovchi hujjatning nusxalari.
Mehmonxonaga toifa berishda muvofiqlikni baholash jarayoniga xizmatlar sohasidagi xorijiy “Katta to‘rtlik” kompaniyalari yoki ularning mutaxassislarini jalb etish sertifikatlashtirishning majburiy sharti hisoblanadi.
Xorijiy kompaniya yoki uning O‘zbekiston Respublikasidagi vakolatxonasini jalb etish orqali baholashni tashkil etish va o‘tkazish bo‘yicha qo‘shimcha xarajatlar sertifikatlashtirish shartnomasiga kiritiladi.
Xorijiy kompaniya yoki uning O‘zbekiston Respublikasidagi vakolatxonasini jalb etish qo‘mita qarori bilan amalga oshiriladi.
Qo‘mita ariza kelib tushgan kundan boshlab, o‘n kun muddatda uning nizomda belgilangan talablarga mosligini o‘rganib chiqadi hamda arizani qanoatlantirish yoki uni rad etish to‘g‘risida qaror qabul qiladi.
Qo‘mita tomonidan arizani o‘rganib chiqishda qo‘shimcha hujjatlarni so‘rab olish yoki qo‘shimcha o‘rganishlar o‘tkazish talab etilsa, arizani o‘rganib chiqish bir oygacha bo‘lgan muddatda amalga oshiriladi.
Qo‘mita ariza beruvchini subsidiyalar ajratish yoki arizani rad etish to‘g‘risida asoslantirilgan holda yozma shaklda, shu jumladan elektron axborot tizimi orqali xabardor qiladi.
Ariza rad etilgan hollarda investor qo‘mitaga arizani qayta ko‘rib chiqish uchun takroran murojaat qilishi mumkin. Ariza takroran taqdim etilgan kundan boshlab besh kun mobaynida qo‘mita tomonidan qayta ko‘rib chiqiladi.
Arizasi qanoatlantirilgan investorga subsidiyalar ajratish qo‘mitaning tegishli buyrug‘i asosida amalga oshiriladi. Ushbu buyruqda subsidiya miqdori, ajratish davri, mehmonxona nomi, yulduz toifasi va xonalar fondi, manzili va uning kadastr raqami, subsidiya olayotgan investor - yuridik shaxs nomi va STIR raqami, tijorat bankdagi hisob raqami ko‘rsatiladi. Mazkur buyruq nusxasi uch kun muddatda qo‘mita tomonidan O‘zbekiston Respublikasi Moliya vazirligiga yetkazilishi ta'minlanadi.
Tashkilotlar uchun dunyoning taniqli va nufuzli mehmonxona brendlaridan foydalanish bo‘yicha royalti franchayzing to‘g‘risidagi shartnoma kuchga kirgan vaqtdan boshlab uch yil mobaynida Davlat budjeti mablag‘lari hisobidan qisman moliyalashtiriladi.
Davlat budjeti mablag‘lari hisobidan franchayzing to‘g‘risidagi shartnoma bo‘yicha qisman moliyalashtirish quyidagi talablarga javob berganda amalga oshiriladi:
dastlabki 50 ta 3 yulduzli toifaga ega mehmonxona — har bir mehmonxonaning bitta xonasi uchun yillik 200 AQSh dollari ekvivalentida;
dastlabki 30 ta 4 yulduzli toifaga ega mehmonxona — har bir mehmonxonaning bitta xonasi uchun yillik 400 AQSh dollari ekvivalentida.
Dunyoning taniqli va nufuzli mehmonxona brendlaridan (“Brand Finance” yoki qo‘mita tomonidan belgilangan boshqa reyting agentligiga muvofiq mehmonxonalar ro‘yxati bo‘yicha top-50 reytingiga ko‘ra) foydalanish bo‘yicha tadbirkorlik sub'yektlari uchun royalti kuchga kirgan vaqtdan boshlab uch yil mobaynida Davlat budjeti mablag‘lari hisobidan qisman moliyalashtiriladi.
Bunda tashkilotlar uchun royaltini qisman moliyalashtirishning umumiy hajmi ko‘pi bilan 10 million AQSh dollari ekvivalentiga teng bo‘ladi.
Tashkilotlar Davlat budjeti mablag‘lari hisobidan qisman moliyalashtirish uchun qo‘mitaga belgilangan tartibda ariza bilan murojaat qiladi.
Arizaga quyidagilar ilova qilinadi:
ariza beruvchining – yuridik shaxs bo‘lgan O‘zbekiston Respublikasi rezidentining nomi, joylashgan yeri (pochta manzili) va STIR raqami va tijorat bankidagi hisobraqamlar rekvizitlari;
tashkilotlar hamda taniqli va nufuzli mehmonxona brendlari bilan franchayzing to‘g‘risida tuzilgan shartnoma nusxasi;
mehmonxonani 3 yoki 4 yulduzli mehmonxona toifasini tasdiqlovchi hujjatning asl nusxasi;
mehmonxona xizmatini ko‘rsatish bo‘yicha sertifikat nusxasi.
Qo‘mita ariza kelib tushgan kundan boshlab, o‘n kun mobaynida uning nizomda belgilangan talablarga mosligini o‘rganib chiqadi va arizani qanoatlantirish yoki uni rad etish to‘g‘risida qaror qabul qiladi.
Qo‘mita tomonidan arizani o‘rganib chiqishda qo‘shimcha hujjatlarni so‘rab olish yoki qo‘shimcha o‘rganishlar o‘tkazish talab etilsa, arizani o‘rganib chiqish bir oygacha bo‘lgan muddatda amalga oshiriladi.
Qo‘mita ariza beruvchini qisman moliyalashtirish yoki arizani rad etish to‘g‘risida asoslantirilgan holda yozma shaklda, shu jumladan, elektron axborot tizimi orqali xabardor qiladi.
Ariza rad etilgandan hollarda tashkilotlar qo‘mitaga arizani qayta ko‘rib chiqish uchun kiritishlari mumkin. Ariza takroran taqdim etilgan kundan boshlab besh kun mobaynida qo‘mita tomonidan qayta ko‘rib chiqiladi.
Tashkilotlarga Davlat budjeti mablag‘lari hisobidan qisman moliyalashtirish qo‘mitaning tegishli buyrug‘i asosida amalga oshiriladi. Ushbu buyruqda moliyalashtirish miqdori, ajratish davri, mehmonxona nomi, yulduz toifasi va xonalar fondi, manzili va uning kadastr raqami, moliyalashtirish miqdorini olayotgan tashkilot - yuridik shaxs nomi va STIR raqami, tijorat bankdagi hisob raqami ko‘rsatiladi. Mazkur buyruq nusxasi uch kun muddatda qo‘mita tomonidan O‘zbekiston Respublikasi Moliya vazirligiga yetkazilishi ta'minlanadi.
