Bekor bo‘lgan kelishuv va tovlamachilikda ayblanayotgan fuqarolar. Mirobodda tadbirkor va mahalla o‘rtasidagi bir yillik mojaro
|00:53 / 08.03.201925 97713 min
2018 yilning aprel oyida Kun.uz’ga Toshkent shahri Mirobod tumani Mirobod MFYda istiqomat qiluvchi bir guruh fuqarolar murojaat qilishgandi.Murojaatda ular mahalla hududida«RENT GROUP INVESTMENTS» MChJ tomonidan qurilayotgan guzar loyihasidan noroziligini bayon etishgan. Sayt muxbirlari murojaatni joyiga chiqib o‘rganishi davomida o‘tkazilgan muzokaralarda taraflar (Mirobod tuman hokimiyati, tadbirkor va fuqarolar) kelishuvga erishishgandi. Ya'ni, bir oy muddatda mahalla fuqarolar yig‘ini o‘zlari xohlagandek guzar loyihasini tayyorlashadi, kerakli mablag‘ni shakllantirishadi va loyiha hokimlikka taqdim etiladi. Ular ko‘rib chiqqanlaridan so‘ng, kerakli tashkilotlar bino qurilishiga ruxsat beradi.
Biroq joriy yilning fevral oyiga kelib mazkur mahallada yashovchi fuqarolar yana sayt bilan bog‘lanishdi. Yana muxbirlar borib vaziyatni o‘rganishdi. Ma'lum bo‘lishicha, orada yana ko‘p tortishuvlar bo‘lib o‘tgan. Loyiha bir necha bor o‘zgartirilgan. Lekin norozilik saqlanib qolavergan.
O‘sha vaqtda, qurilish ishlari boshlangan chog‘da bino asosini qurish uchun hududda qazuv ishlari olib borilgan. Lekin aholi qarshiligi tufayli qurilish to‘xtatilgan va chuqurlik atrofi o‘rab qo‘yilgan.
O‘sha atrofda yashovchi bir necha kishi bilan suhbatlashdik.
Video: Mover (tas-ix)
Video: Youtube
O‘zbekiston Respublikasi Prezidentining «Mahalla institutini yanada takomillashtirish chora-tadbirlari to‘g‘risida»gi Farmoni fuqarolar o‘zini o‘zi boshqarish organlarining mahalliy ahamiyatga molik masalalarni samarali hal qilishdagi rolini oshirish, fuqarolar yig‘inlarining mushtarak manfaatlarini ifoda etadigan uyushmaga birlashish huquqini ro‘yobga chiqarish, ularning moddiy-texnika bazasini mustahkamlash hamda davlat organlari va fuqarolik jamiyati institutlari bilan o‘zaro hamkorligini yanada rivojlantirishga qaratilgan tashkiliy-huquqiy chora-tadbirlarni belgilab berdi. Shu asosida mahalla faollari mahalla instituti faoliyatini samarali olib borishi uchun ularga mahalla guzarlari qurish ko‘rsatib o‘tildi.
Mavzuga oid
Ayni vaqtda kavlangan hudud hali ham tashlandiq holida yotibdi. Aholi bu holat xavfsizlik nuqtai nazaridan belgilangan talablarga javob bermasligi haqida gapirdi.
«Avvallari bu yerda bolalar o‘ynashardi, avtoturargoh va boshqa maqsadlarda foydalanishgan. Ko‘rsatilgan loyihalar fuqarolarga ma'qul kelmagan. Tuman hokimi bilan bir necha bor suhbatlashishgan. Yaqinda shahar hokimi Jahongir Ortiqxo‘jayev bilan uchrashuv chog‘ida ham mutasaddilarga tegishli ko‘rsatmalar berilgandi. Shu asosda so‘rovnoma ham o‘tkazilgan. Natijasiga ko‘ra juda ko‘pchilik binoni mazkur tadbirkor qurishiga qarshi chiqqandi.
Biz qurilish ishlariga qarshi emasmiz. Lekin hozir taqdim qilinayotgan loyiha 4 qavatli bo‘lib ketmoqda. Biz bino 2 qavatdan yuqori bo‘lishini xohlamaymiz. Bu shaharsozlik normalariga ham tushmaydi. Atrofda ko‘p qavatli uylar ko‘p. Mayli qursin. Yerto‘la qismidan va bir qavatidan o‘zi foydalansin. Bir qavatini mahalla guzari uchun taqdim qilsin. Biz katta qilib savdo komleksi qurilishiga qarshimiz. Agar bino biz istagandek qurilmasa, chuqurni yopib tekislab berishsin. Bunday yotishi bo‘lmaydi. Biz o‘zimiz bu joyga ko‘chat o‘tqazamiz, obodonlashtirish ishlari qo‘limizdan keladi», - deydi mahalla faollaridan biri Ma'ruf Musayev.
Shundan keyin tuman hokimligiga borib, tuman hokimi o‘rinbosari Farhod Najmiddinovdan izoh oldik.
«2017 yilning 7 avgust sanasida «RENT GROUP INVESTMENTS» MChJga Mirobod tuman Nukus ko‘chasi 88 va 5-uylar oralig‘ida zamonaviy mahalla loyihasi asosida mahalla guzari va savdo maishiy xizmat ko‘rsatish majmuasini qurish uchun yer ajratilgan. Qurilish boshlangan vaqtda aholi norozilik bildirdi. Shu tufayli bir necha marta loyiha o‘zgartirildi. Hozirga kelib loyihaning yuqori qismi qurilishiga o‘sha yerda yashovchi ba'zi fuqarolar norozi bo‘lmoqda.
Lekin tadbirkorning barcha hujjatlari joyida. Aholi noroziligi bizning qarorni bekor qilishga asos bo‘lmaydi. Qonun bo‘yicha tegishli prokuror protest kiritganidan so‘ng, sud bekor qilinsin degan qaror chiqarib, u qonuniy kuchga kirganidan keyin, qarorni bekor qilamiz. Biz ijro organimiz, qonun nima desa shuni bajaramiz. Farmon talablarini bajarsa, marhamat, tadbirkor o‘z loyihasini bajarishi mumkin. Biz qonunni chetlab tadbirkor tomonga ham, fuqarolar tarafga ham yon bosmaymiz», - dedi tuman hokimi o‘rinbosari.
Farhod Najmiddinov
Nihoyat «RENT GROUP INVESTMENTS» MChJ direktori Abdusaid Hidoyatovga yuzlandik. Undan bo‘lib o‘tgan voqealar yuzasidan to‘liq ma'lumot olishga harakat qildik.
«Prezident farmoni, Toshkent shahar hokimining qarorlari, mahalla kengashi qarori va investitsiya shartnomasi asosida guzar qurilishi ishlari boshlangan.
Mahalla markazining dastlabki loyihasi tayyorlanib 2017 yilning 4 noyabr kunida faollar bilan yig‘ilish o‘tkazildi. Uchrashuvda mahalla vakillari ham qatnashgandi. Loyiha bitta 3 qavatli, 25 metrga 45 metr o‘lchamda bo‘lgan. Shunda faollar 3 emas 4 qavatli qilib qurish taklifini bergan. Majlisda oq fotiha bergan otaxonlar keyinchalik loyihaga o‘zlari qarshi chiqishdi.
E'tirozlar sabab ikkita 4 qavatli loyiha tayyorlandi. Birinchi binoning birinchi qavati to‘liqligicha mahalla guzari uchun ajratilishi belgilandi. Ikkinchi bino esa biznes markaziga aylantirilishi belgilandi. Tegishli tashkilotlardan ruxsatnomalar ham olindi.
Lekin bunday loyiha aholi e'tirozlariga sabab bo‘ldi. Asos qilib quyidagilarni aytishdi:
- Bino 4 qavatli bo‘lishi havo aylanishiga to‘sqinlik qiladi;
- Bitganidan so‘ng hududda yashovchi aholi avtomobillari uchun turargoh maydoni qolmaydi;
- Bolalar maydonchasi ham yo‘q bo‘ladi (aslida bu yerda bunday maydon umuman bo‘lmagan, quruq yer bo‘lgan).
2018 yilning 6 aprel kuni tuman hokimi Shuhrat Po‘latov va aholi vakillari bilan uchrashuv o‘tkazildi. Aholi e'tirozlari inobatga olinib, qurilishi kerak bo‘lgan 4 qavatli bino loyihasi 2 qavatli bino loyihasiga almashtirildi. Bolalar sport maydonchasi va o‘yin maydonchasi uchun joy ajratildi. Aholi avtomobillari uchun bino yerto‘lasida bepul avtoturargoh qurilishi belgilandi. Yana qurilishi ko‘zlanayotgan binoning yon tarafida qolayotgan kattagina joyda 100ga yaqin avtomobil uchun soyabonli avtomobillar turar joyi barpo etish taklifi ham bildirildi. Mahalla faollari bunga rozi bo‘lishdi.
2018 yilning 12 aprel kuni hududni o‘rash ishlari boshlangan vaqtda aholi yana norozilik bildira boshladi. Tuman hokimi va OAV vakillari ham keldi. Muzokara yakunida aholi guzarni o‘z kuchi bilan qura olishini bildirdi. Ularga kerakli loyihani tayyorlash va mahalla jamg‘armasiga kerakli mablag‘ni shakllantirish uchun 1 (bir) oy muddat berildi. Lekin mahalla birorta talabni bajarmadi. O‘sha norozilik uyushtirayotganlar bir so‘m ham bermadi.
Bu orada aholidan tushgan arizalar asosida tuman prokurori hokim qarorini bekor qilish bo‘yicha protest kiritdi. 2018 yilning 1 may kuni tuman hokimi prokurorga asoslantiruvchi xat yubordi va qarorni o‘z kuchida qoldirdi.
2018 yil 12 may kuni «Mahalla» jamoat fondi boshqaruvida mahalla fuqarolari bilan uchrashuv o‘tkazildi. Ular guzar qurilishiga qarshi emasligini, faqat ikkita bino emas bitta (2 qavatli) bino qurilishiga rozi bo‘lishlarini bildirishdi.
2018 yil 16 may kuni Toshkent shahar hokimligida qabul bo‘lib o‘tdi. Mahalla nomidan M.Mirzayev va M.Ismatov ishtirok etdi. Qabulni hokim o‘rinbosari N.Maksumov o‘tkazdi. Vakillar bitta 2 qavatli bino ko‘rinishida loyihaga roziligi va birinchi qavatdan mahalla vakillariga joy ajratib berilishini so‘rashdi.
Tuman hokimining 2018 yil 4 iyundagi 514-sonli qarori qabul qilindi. Ushbu qarorning ikkinchi bandida mahallaga bitta 2 qavatli bino qurish kerakligi qat'iy belgilab qo‘yildi.
Bu vaqtga kelib bir guruh fuqarolar Sergeli tuman ma'muriy sudiga ham murojaat qilishdi. Shuningdek, Mirobod tuman prokuraturasi ham hokimning yer ajratish haqidagi qarorini bekor qilishni so‘ragan. Ikki murojaat birlashtirilib, sayyor sud majlisi o‘tkazildi. Taraflarning fikri o‘rganildi. Qarorni bekor qilishni qanoatlantirish rad etildi. Yakunda o‘lchamlari 23 metrga 25 metr bo‘lgan 2 qavatli bino qurishga kelishildi. Binoning birinchi qavatidan mahalla uchun 8ta xona ajratilishi belgilab qo‘yildi», - deydi tadbirkor.
Biroq, 2018 yilning sentabr oyiga kelib bir guruh mahalla fuqarolari tadbirkorning ish boshlashiga qarshilik ko‘rsatmasliklari uchun 40 ming AQSh dollari miqdorida pul talab qilishadi (tahririyatda barcha dalillar mavjud). Tadbirkorning arizasi asosida Toshkent shahar prokuraturasi xodimlari tomonidan shu mahallada yashovchi fuqaro (aybsizlik prezumpsiyasi yuzasidan ismlarni oshkor etilmaydi) tadbirkordan 10 ming AQSh dollari olayotgan vaqtda qo‘lga olinadi. Fuqaroga nisbatan tovlamachilik jinoyati bo‘yicha ish qo‘zg‘atilgan va tegishli tashkilotlar tomonidan tergov harakatlari olib borilmoqda.
Shu vaqtga qadar qanday ishlar amalga oshirilgani va tergov nega hali tugamayotganini aniqlash maqsadida, Toshkent shahri Yunusobod tuman ichki ishlar organlari faoliyatini muvofiqlashtiruvchi boshqarma huzuridagi tergov bo‘limiga murojaat qildik. Tergovchi M.Sanakulov bilan bog‘lanishga harakat qildik. Yunusobod tuman IIB boshlig‘i Ichki ishlar vazirligi matbuot xizmati orqali ma'lumot taqdim etishi mumkinligini bildirdi. Matbuot xizmati mazkur holat yuzasidan ma'lumot faqatgina taraflar yoki ularning vakillariga berilishi mumkinligini aytdi. Ertasiga firma direktori bilan Yunusobod tuman ichki ishlar bo‘limiga bordik. Biroq ma'lumot ololmadik. Hozir tergov qaysi bosqichdaligi bizga noma'lum. O‘ylaymizki, bu ishda protsessual norma talablariga amal qilinadi, ayblanuvchiga doir tergov yakuniga yetkaziladi va biz mavzuga yana qaytamiz.
Sud qaroridan so‘ng, tadbirkor loyihani yana boshqatdan tayyorladi va tegishli tashkilot tomonidan tasdiqlatdi. Ma'lum vaqtdan so‘ng qayta qurilish ishlari boshlanadi. Ammo fuqarolar tomonidan yana noroziliklar paydo bo‘la boshlaydi. Hozirgi norozilik binoning yuqori qismi tufayli bo‘lmoqda. Bu mahalla vakillariga yoqmayapti. Lekin tegishli tashkilot loyihani qonunan ko‘rib chiqib tasdiqlab bergan. Hozirga kelib 500 million so‘mga yaqin mablag‘ sarflagan tadbirkor yo‘lida sun'iy to‘siqlar paydo bo‘lganini bildirmoqda. Shu sababli qurilishni davom ettirishga ikkilanib turibdi.
Uning ta'kidlashicha, prezident farmonida talab qilingan barcha sharoitlar yaratiladi. Binoda va atrofida ma'naviyat xonasi, profilaktika inspektorlari uchun joy, kutubxona, majlislar zali, bolalar o‘yingohi, sport maydonchasi va boshqa sharoitlar muhayyo qilinadi. U agar aholi vakillari tinmay qarshilik qilib turishsa, loyihani oxirigacha yetkaza olmasligini bildirib o‘tdi.
Milliy urf-odatlarimizdan kelib chiqsak, mahalla hayotida turli xil ijtimoiy masalalar muhim o‘rin tutadi. Ularni hal qilish va tegishli choralar ko‘rish zarur. Buning uchun maxsus joylar-guzarlar qurilishi respublikamizda keng ko‘lamda olib borilmoqda.
Yuqoridagi holatlardan xulosa qiladigan bo‘lsak, muammo juda ham jiddiy emas. Tadbirkorning loyiha bo‘yicha barcha huquqiy hujjatlar mavjud. Fuqarolarning ham o‘z vajlari bor. Shunchaki, murosaga kelish uchun ikkala taraf ham bir-biriga qarab harakatlanishi kerak. Xohish-istaklar hisobga olinishi zarur. Tegishli tashkilotlardan esa ikki tarafni ham qoniqtiradigan choralar topishda tashabbus ko‘rsatishni kutib qolamiz.
