«Bu bizning vazifamiz emas!» Bir yarim oydan buyon rahbarma-rahbar yugurib sargardon bo‘layotgan Asakadagi mahalla ahli muammosi haqida

«Muxbir aka, 20 yanvardan beri ahvol shu. Elektr tarmoqlari rahbari «Bu simyog‘och va transformator mening balansimda emas, tuzatish meni vazifamga kirmaydi», deydi. Tuman hokimi o‘rinbosariga borsak, avval va'da berib, keyin: «Hadeb telefon qilavermang. Shundoq ham, ishimiz ko‘p» deya gapni qisqa qilsa... Kimga boraylik?». Fuqarolar tomonidan kelgan mana shu muammo ortidan Asakaga bordik.  

Ba'zida mahalliy hokimiyat va tarmoq rahbarlarining aholi tomonidan qilingan oddiy murojaatga ham bee'tibor bo‘lishini ko‘rib hayron qolasiz. Nahotki, jamiyatimizdagi bugungi o‘zgarishlar ularning yelkasiga mas'uliyat yukini yuklamayotgan bo‘lsa? Axir, har qanday rahbarga eng avvalo xalq xizmatini qilish uchun ma'lum bir mas'uliyatli vazifa yuklangan.

Andijon viloyati, Asaka shahridagi Guliston ko‘chasiga borganimizda bizni Ergashobod, Ibn Sino, Bo‘ston mahallalarining «Zarbdor Yangichek», «Shohimardon» va «Ziyokor» ko‘chalarida yashovchi aholi vakillari kutib turishgan ekan.

Muammo shundaki, mazkur ko‘chalarga suv tortuvchi qurilmalarga elektr yetkazib beruvchi transformatorga ulangan simyog‘och 20 yanvar kuni qulab tushgan. Suv tortish inshooti elektrdan uzilgach, mahallalardagi 300 chog‘li xonadon ichimlik suvisiz qolgan.

Qiziq masala, mazkur transformator va simyog‘och mahalla aholisi tomonidan o‘z mablag‘lariga ko‘p yillar oldin o‘rnatilgan ekan. «Yonboshlab» qolgan simyog‘ochni darrov xavfsiz holga keltirish va o‘rnatish suv nasoslari turgan xonani ta'mirlash va yana ulab aholi muammosini hal qilish kerak edi.  

 Muammoning eng yomon holatli tomoni, simyog‘och ag‘anaganda suv nasoslari o‘rnatilgan binoning bir tarafi ariqqa og‘ib ketgan. Bino ichidagi javonda va uning atrofidagi simlarda 6 ming volt elektr borligi juda xavfli holatdir.

 Agar avariya holatidagi xona va javonga biror yosh bola ehtiyotsizlik bilan kirib qolsa, falokat yuz berishi xavfi mavjud.

Simyog‘och qulab tushgan kuni mahalla faoli, tadbirkor yigit Azizbek Isaqov avval tuman elektr tarmoqlari rahbari Xurshid Yuldashevga uchraganini aytdi.  

«27 yanvar kuni elektr tarmoqlari injyeneri kelib, «Kran topib bering!» dedi. Men tuman «Suvoqova» tashkilotiga aytdim, ularga rahmat, viloyatdan kran chaqirib berishdi. Shundan so‘ng elektr tarmoqlari xodimlari, simyog‘ochni sug‘urib, ko‘prik tepasiga qo‘yib ketib qolishibdi. Simyog‘ochni joyiga o‘rnatishga erinishgan chog‘i...

Shundan so‘ng yana elektr tarmoqlariga bordik. Ish bitmadi. Rahbari, «Bu transformator va simyog‘och bizning balansda emas. Uni tuzatish, o‘rnatish bizning vazifalarimizga kirmaydi», dedi. Tuman hokimligiga bordik. Hokim o‘rinbosari Ulug‘bek aka tuzatishga va'da berdi. Lekin, kunlar o‘tsa ham o‘zgarish bo‘lmadi. Telefon qilsak, hadeb telefon qilavermaslikni so‘raydi va simyog‘och o‘zi ariqning himoya zonasida ekanligini aytadi. To‘g‘ri, transformator va simyog‘ochni mahalla pul to‘plab o‘sha paytda 18 million so‘mga olganmiz. Bu uskunalar «elektroset» balansida turmaydi. Lekin, tumanda elektr simlarini ulaydigan va simyog‘ochni joyiga o‘rnatadigan mutaxassislar boshqa idorada yo‘q-ku? Tuman hokimligiga boraverib, zada bo‘lib ketdik. Endi, respublika idoralariga murojaat qildik», deydi Azizbek.

Qarangki, aholi oddiygina muammoni hal qila olmagani uchun mahalliy hokimiyat vakillari ustidan respublika mutasaddilariga  arznoma yozyapti.

Sabab, bitta – muammoning egasi yo‘q!

«Ishchi guruh keladi, sektor a'zolari keladi. Qog‘oz qoralaydi, savol beradi. Hech foydasi bo‘lmasa... Men sizga ham ishonmayman. Kelasiz-ketasiz. Transformator uzilib, simyog‘och esa ag‘anab yotgani va suv nasosi ishlamay qolganining birovga qizig‘i yo‘q», deydi o‘zini Azimjon Hamroqulov deya tanishtirgan otaxon. U kishi «Ziyokor» ko‘chasida istiqomat qilar ekan.

Ba'zida, mana shunday oddiy xalq muammosiga loqaydlik bilan qarab, aholi tushunchasida, bugungi islohotlar va ijobiy o‘zgarishlarga salbiy munosabat uyg‘otayotgan rahbarlar borligidan afsuslanib ketasiz.

«Bu muammo bizga taalluqli emas», «Masalani mening idoram hal qilmaydi», «O‘z vazifamdagi narsani talab qiling», kabi javoblar esa asakalik aholini qiynamoqda.

 Axir transformator uzilib, simyog‘och ag‘anasa elektr tarmoqlari tuzatmasdan, xalq ta'limi o‘nglaydimi? Aholi mazkur muammoni  hokimiyatga borib aytmasa, kimga aytadi?

Viloyat va tuman mutasaddilari tanqidiy maqola chiqqanidan so‘ng, «shart emas edi, to‘g‘rilab qo‘yardik», deya e'tiroz qilishi ham bor.

Axir, aholi mahalliy hokimiyat eshigini taqillata-taqillata javob ololmagach, sayt tahririyatiga murojaat qilgan-ku?

To‘g‘risi, Asaka shahrida bir yarim oydan beri 300 xonadonni suvsiz qoldirib kelayotgan muammoni biz ham «Bu muammo bizga taalluqli emas» deb keta olmadik.

Elmurod Ermatov, Andijon