Suriya AQShga ikkita shtatni Isroilga berib yuborishni taklif qildi

Suriyaning BMTdagi doimiy vakili Bashar Ja'fariy AQShga Shimoliy yoki Janubiy Karolinani Isroilga berib yuborishni taklif qildi. Bu haqda RIA «Novosti» xabar tarqatdi.

«AQSh yetarlicha yerga egadir. Isroilga bir nechta shtatlarni sovg‘a qilib yuboringlar», - dedi Ja'fariy.

Uning so‘zlariga ko‘ra, Qo‘shma Shtatlar Isroilni yangi hududlar bilan qo‘llab-quvvatlashga qaror qilsa, shunday harakatni amalga oshirishi kerak.

Bundan oldin, Suriya Golan tepaliklari bo‘yicha zudlik bilan BMT Xavfsizlik kengashi yig‘ilishi o‘tkazilishini talab qilgandi.

Eslatib o‘tamiz, dushanba kuni AQSh prezidenti Donald Tramp Isroilning Golan tepaliklari ustidan suverenitetini rasman tan oldi.