Messi karerasidagi eng chiroyli golini aytdi

«Barselona» hujumchisi Lionel Messi faoliyati davomida urgan gollari orasidan qaysi birini eng chiroyli deb hisoblashini aytdi.

«Eng yaxshi golimni Chempionlar ligasi yarimfinalida «Real»ga urgandim», – degan Leodan iqtibos keltirmoqda El Chiringuito.

Argentinalik sardor 2010/11 mavsumida YeChLning 1/2 finali doirasida «Real»ga qarshi ilk uchrashuvda (2:0) ikkala golga ham mualliflik qilgandi. O‘shanda Barselonada o‘tgan javob bahsida durang (1:1) qayd etilgan, «ko‘k-anorranglilar» Londondagi finalda «Manchester Yunayted»ni yengib (3:1), bosh sovrinni qo‘lga kiritishgandi.

Eslatib o‘tamiz, avvalroq so‘rovnoma asosida «Barselona» tarixidagi eng chiroyli gol aniqlangandi. Unda Messining Ispaniya kubogi 2006/07 mavsumining yarimfinalida «Xetafe» darvozasiga kiritgan to‘pi shunday e'tirofga loyiq ko‘rilgan.