Agarda o‘lim jazosi xavf soladigan bo‘lsa, Buyuk Britaniya WikiLeaks asoschisi Julian Assanjni AQShga topshirmaydi. Bu haqda Sky News telekanali efirida Britaniya tashqi ishlar vaziri o‘rinbosari Alan Dankan ma'lum qildi.
"Har qanday vaziyatda bizning umumiy siyosatimiz ana shunday va Julian Assanjga nisbatan ham bir xilda bo‘ladi. Shuning uchun agar unga o‘lim jazosi xavf soladigan bo‘lsa, ekstraditsiya qilinmaydi", - dedi Dankan.
Assanj payshanba kuni Ekvadorning Britaniya poytaxtidagi elchixonasida London politsiyasi tomonidan hibsga olindi. Avvalroq Ekvador Assanjga boshpana berishni rad etgandi.
