O‘zbekiston Bosh prokuraturasi Farg‘ona viloyati Qo‘qon shahridagi 8-sonli umumiy ta'lim maktabida ro‘za tutgan o‘quvchilar maktab hovlisida yugurtirilgani haqida tarqalgan xabarlar yuzasidan ma'lumot berdi.
Farg‘ona viloyati prokuraturasining Kun.uz’ga taqdim etilgan ma'lumotnomasiga ko‘ra, 608 nafar o‘quvchiga mo‘ljallangan maktab hududida (1928 yilda qurilgan maktabda hozirda 912 nafar, shundan 523 nafar boshlang‘ich sinf o‘quvchilari tahsil olib kelmoqda) surishtiruv ishlari olib borilgan.
«O‘rganish davomida maqolada ko‘rsatilgan holatlar yuzasidan 8-sonli umumiy ta'lim maktabi direktori va maktabning boshqa mansabdor shaxslari hamda o‘qituvchilardan yuqoridagi holat yuzasidan tushuntirishlar olindi.
Holat yuzasidan tushuntirish bergan maktab direktori Feruza Jabbarova ijtimoiy tarmoqlarda tarqalgan ma'lumotlar noto‘g‘riligini, joriy yilning 6 may kuni tushlik vaqtida darslari tugab uyga qaytayotgan boshlang‘ich sinf o‘quvchilariga o‘zlarini ehtiyot qilib yurishlari va vitaminlarga boy ovqatlarni iste'mol qilishlari kerakligini aytgani, biroq ularga hech qanday tazyiq o‘tkazmaganini bildirgan.
Shu kabi, maktab o‘qituvchilari ham o‘z tushuntirishlarida maktab hududida bunday salbiy holat umuman bo‘lmaganini bayon qilishgan.
Shuningdek, holat yuzasidan boshlang‘ich sinf o‘quvchilari bilan pedagog psixologlar ishtirokida suhbatlashilganda, ro‘za tutgan bolalarni hech kim maktab hovlisida yugurtirmaganini bildirishgan.
O‘rganish davomida, maktab direktori tomonidan joriy yilning 6 may kuni ro‘za tutgan boshlang‘ich sinf o‘quvchilarini maktab hovlisida yugurtirgani holati o‘z tasdig‘ini topmadi», deyiladi prokuratura xabarida.
Shuningdek, Qo‘qon shahar xalq ta'limi bo‘limi tomonidan ham vaziyat o‘rganilgan.
«Xizmat surishtiruvi davomida shular ma'lum bo‘ldiki, mazkur maktabda o‘quvchilar ro‘za tutishlari uchun hech qanday tazyiq o‘tkazilmagan. O‘qituvchilar tomonidan avvalo o‘quvchilar bilim egallashi muhimligi, fanlarni o‘zlashtirish uchun sog‘lom bo‘lishlari shartligi, shuning uchun ham vaqtida ovqatlanishga e'tibor qaratilishi xususida tushuntirishlar berilgani aniqlandi.
8-umumiy o‘rta ta'lim maktabida hech qachon futbol maydoni bo‘lmagan. Maydon yaqinda maktab rahbariyati tomonidan barpo etilgan. Unda o‘quvchi yoshlar futbol hamda jismoniy mashqlar bilan shug‘ullanib kelishmoqda. Maktabning boshlang‘ich sinf o‘quvchilari uchun bepul fitobarlar tashkil etilgan.
Mazkur maktabda ta'lim sifatiga alohida e'tibor qaratilayotgan bo‘lib, malakali pedagog-o‘qituvchilar mehnat qilib kelmoqda. Ma'naviy-ma'rifiy ishlar ham namunali tashkil etilgan bo‘lib, maktab o‘quvchilari o‘rtasida turli tadbirlar, sport musobaqalari o‘tkazib kelinmoqda.
