Litvada prezident saylovlarining 2-turi bo‘lib o‘tadi

Litvada 26 may kuni prezident saylovlarining 2-turi va Yevroparlamentga deputatlar saylovlari bo‘lib o‘tadi. 

Prezident saylovlarining 2-turi 1-turidan 2 haftadan keyin bo‘lib o‘tmoqda. 1-turda 9 nomzoddan birortasi g‘alaba uchun zarur bo‘lgan 50 foizdan ko‘proq ovoz to‘play olmagandi.

2-turga 44 yoshli sobiq moliya vaziri Ingrida Shimonite va 54 yoshli iqtisodchi Gitanas Nauseda o‘tdi. Ular mos ravishda 31,13 va 30,94 foiz ovoz olishgan, farq bor-yo‘g‘i 5323 ovozni tashkil qilgan. Mutaxassislar fikricha, nomzodlarning imkoniyatlari deyarli teng.

Litvaning amaldagi prezidenti Dalya Gribauskayte ushbu lavozimni 2-muddat egallayotgani sababli 3-muddatga saylana olmaydi.

Prezident yashirin ovoz bilan 5 yilga saylanadi. 

Litvadagi prezident saylovlari Yevroparlamentga deputatlar saylovlarini orqa planga surib qo‘ydi. Litva Yevroparlamentda 11 ta o‘ringa ega bo‘lib, bu o‘rinlar uchun 302 nomzod, ya'ni har bir o‘ringa deyarli 30 nafardan nomzod da'vogarlik qilmoqda.