Otabek Umarov Habib Nurmagomedov bilan mashg‘ulotda qatnashdi

UFC bo‘yicha jahon chempioni rossiyalik Habib Nurmagomedov O‘zbekiston triatlon federatsiyasi raisi Otabek Umarov bilan birgalikda mashg‘ulotda qatnashdi. Bu haqda Otabek Umarov o‘zining instagramdagi sahifasida ma'lum qildi.

«Taniqli aralash jang san'ati ustasi, rossiyalik UFC jangchisi Habib Nurmagomedov jonajon O‘zbekistonimizga mehmon bo‘lib tashrif buyurdi.  U bilan birga mashg‘ulot o‘tkazdik. Habib bilan mashg‘ulot o‘tkazgan hamyurtlarimiz ajoyib inson bilan muloqot qilishga muyassar bo‘ldilar.

U mashhurligiga qaramay, nihoyatda kamtar va samimiy inson ekan. Habibning sportda erishgan yuksak natijalarida otasi Abdulmannop Nurmagomedovning katta hissasi bor. 

U o‘g‘liga sportning ilk sirlarini o‘rgatgan va o‘ziga bo‘lgan ishonchni uyg‘ota olgan. Habib o‘z xalqining an'analariga sodiq munosib farzand, O‘zbekiston va butun dunyo yoshlari uchun namuna»,- deb yozdi Umarov o‘z sahifasida.

Oldinroq Nurmagomedov Toshkentga kelgani haqida post joylagan va Samarqand palovini maqtagandi.