Ramazon oyida 5,5 ming o‘zbekistonlik umra ibodatini ado etdi 

O‘zbekiston Milliy matbuot markazida Ramazon hayitini nishonlash bo‘yicha OAV uchun brifing bo‘lib o‘tmoqda. Tadbir Vazirlar Mahkamasi huzuridagi Din ishlari bo‘yicha qo‘mita tomonidan tashkil etildi.

Kun.uz muxbiri xabariga ko‘ra, qo‘mita raisining birinchi o‘rinbosari Muzaffar Komilov Ramazon oyida 5,5 ming o‘zbekistonlik umra ibodatini ado etganini ma'lum qildi.

“Umra – 2018-2019 mavsumida 27 ming 380 nafar o‘zbekistonlik ziyoratchi umra ibodatini ado etdi. Shundan  5 ming 500 nafari muborak Ramazon oyiga to‘g‘ri keldi. Ulardan 690 nafari Hayit namozini Makkai mukarramada, Ka'batullohda ado etishdi.

Ziyoratchilarga mavsum davomida 22 nafardan iborat ishchi guruhi, 133 nafar shifokor va  25 nafar oshpaz xizmat ko‘rsatdi. Har bir guruhga bittadan tajribali guruh rahbari biriktirildi”, - dedi u.

Shuningdek, Muzaffar Komilovning aytishicha, ilgarilari bir yilda shuncha kishi umra ibodatini ado qilgan. 2018 yil oxiridan boshlab Umra ziyorati bo‘yicha kvota olib tashlangani, o‘zbekistonlik mo‘min-musulmonlar ziyoratni istagancha amalga oshiradigan bo‘lishgani aytildi.

Bundan tashqari, Haj mavsumiga tayyorgarlik ishlari boshlanishi munosabati bilan Umra safariga yuborish ishlari Haj ibodati tugagandan so‘ng amalga oshirilishi ma'lum qilindi.