Nig‘matulla Yo‘ldoshev yangi bosh prokuror etib tayinlandi
![](https://storage.kun.uz/source/4/lh92dXqhgugf3j6Id8yPQOwj3D5uydsY.jpg)
O‘zbekiston Respublikasi Konstitutsiyasi 93-moddasining 12-bandiga muvofiq Senat raisi Nig‘matulla To‘lqinovich Yo‘ldoshev O‘zbekiston Bosh prokurori etib tayinlandi. Bu haqda prezident matbuot xizmati xabar bermoqda.
U bu lavozimda 2018 yil yanvaridan buyon ishlab kelgan Otabek Murodov o‘rnini egalladi.
Senatning yangi raisi parlament yuqori palatasining 21 iyun kuni chaqiriladigan 20-yalpi majlisida prezident taqdimnomasiga muvofiq senatorlar tomonidan saylanishi kutilmoqda.
Nig‘matulla Yo‘ldoshev 1962 yilda Toshkent shahrida tug‘ilgan, Toshkent davlat yuridik institutini (hozirda universitet) tamomlagan.
U 1987 yildan 2011 yilgacha prokuratura tizimida turli lavozimlarda ishlagan, xususan, Olmaliq shahri prokuraturasida tergovchi (1987-1991), Yunusobod tumani prokuraturasida tergovchi (1991-1993), Toshkent shahri prokuraturasida katta tergovchi (1993-1994), O‘zbekiston Bosh prokuraturasida boshqarma prokurori (1995-1999), Bosh prokuratura Tergov boshqarmasida bo‘lim boshlig‘i (1999-2000), Bosh prokuraturasi tadbirkorlik va investitsiyalarni huquqiy himoya qilish boshqarmasi boshlig‘i (2000-2003), Huquqni muxofaza qilish organlari va nazorat organlarini muvofiqlashtirish bo‘yicha davlat maslahatchisi (2003-2006), Bosh prokuratura huzuridagi Soliq, valutaga oid jinoyatlarga va jinoiy faoliyatdan olingan daromadlarni legallashtirishga qarshi kurashish departamenti boshlig‘i (2006—2008) va Bosh prokuror o‘rinbosari (2008-2011) lavozimlarida ishlagan.
Nig‘matulla Yo‘ldoshev 2011 yilda O‘zbekiston Adliya vaziri lavozimiga tayinlangan va bu lavozimda 2015 yil yanvariga qadar ishlagan.
U 2015 yil yanvarida prezident qarori bilan senator etib tayinlangan, 2015 yilning 22 yanvarida yashirin ovoz berish yo‘li bilan Senat raisi lavozimini egallagandi.
2016 yilning 2 sentyabrida, O‘zbekistonning birinchi prezidenti Islom Karimov vafotidan keyin Konstitutsiya bo‘yicha Senat raisi O‘zbekiston prezidenti vazifasini vaqtincha bajarishga kirishishi kerak edi, ammo 8 sentabr kuni O‘zbekiston parlamentining qo‘shma yig‘ilishida Nig‘matulla Yo‘ldoshev davlat boshqaruvida yetarlicha tajribaga ega emasligi tufayli bu vakolatini o‘z ixtiyori bilan o‘sha vaqtda bosh vazir bo‘lgan Shavkat Mirziyoyevga topshirgandi.
Mavzuga oid
![](https://storage.kun.uz/source/thumbnails/_medium/10/O9bAOhYcTkCkuh7bgdpf2DK5jzCgq_1h_medium.jpg)
18:19 / 20.06.2024
Senat 21 iyun kuni Bosh prokuror lavozimiga nomzodni ko‘rib chiqadi
![](https://storage.kun.uz/source/thumbnails/_medium/9/3lEutc4bytktp83A8rvg6ei_2TVgALIW_medium.jpg)
15:18 / 24.12.2022
O‘zbekiston harbiy prokuroriga ikki o‘rinbosar tayinlandi
![](https://storage.kun.uz/source/thumbnails/_medium/8/sNvOf2W-HEzhBAhM1BTv4-O_rSanlGCW_medium.jpg)
23:11 / 07.05.2022
Bosh prokuror sudlar mustaqilligini mustahkamlashga ehtiyoj borligini aytdi
![](https://storage.kun.uz/source/thumbnails/_medium/8/UU7U4dJI46pGi8bYHe2Bc2L2ZoT8UOsN_medium.jpg)
19:10 / 09.01.2022