1. Rossiya hududiy suvlarida 14 nafar suvosti-dengizchisi halok bo‘ldi
Voqea 1 iyul, dushanba kuni yuz berdi. Halokatga suvosti apparati bortida kelib chiqqan yong‘in sabab bo‘ldi, deb xabar berdi Rossiya mudofaa vazirligi.
«O‘n to‘rt nafar suvosti-dengizchisi yong‘in paytidagi tutun natijasida halok bo‘ldi», — deyiladi vazirlik xabarida.
2. Suvosti apparati mudofaa vazirligi manfaatlari yuzasidan okeanni o‘rganish bilan shug‘ullangan
«1 iyul kuni Rossiya hududiy suvlarida Rossiya harbiy-dengiz floti manfaatlari yuzasidan Jahon okeani tubini o‘rganishga mo‘ljallangan ilmiy-tadqiqot suvosti apparatida batimetrik o‘lchovlar olib borish chog‘ida yong‘in kelib chiqdi», — deb xabar berdi mudofaa vazirligi.
3. Yong‘inni o‘chirishga muvaffaq bo‘lishgan
«Jamoaning sa'y-harakatlari bilan yong‘in o‘chog‘i bartaraf etildi. Suvosti apparati Severomorsk harbiy-dengiz bazasida saqlanmoqda», — deya iqtibos keltiradi TASS mudofaa vazirligidan.
4. Suvosti apparatida tirik qolganlar borligi aniqlandi
Jabrlanganlar mudofaa vazirligining Severomorskdagi harbiy-dengiz klinik gospitaliga keltirilgan. Halok bo‘lgan 14 dengizchining jasadlari ham shu yerga olib kelingan.
Baza Telegram-kanalining xabariga ko‘ra, 4-5 kishi tirik qolgan.
5. Yong‘in kelib chiqishi sababi hozircha noma'lum
Suvosti apparatida yong‘in kelib chiqishi va 14 dengizchining halok bo‘lishi yuzasidan tergov ishlarini Rossiya harbiy-dengiz floti qo‘mondoni Nikolay Yevmenov boshqarmoqda.
Rossiya tergov qo‘mitasi dengizchilarning o‘limi yuzasidan tekshiruv boshladi.
6. Apparat atom suvosti kemasi bo‘lishi mumkin
RBK manbasining ma'lumotiga ko‘ra, u suvosti ilmiy-tadqiqot apparati emas, balki «Losharik» nomi bilan mashhur o‘ta maxfiy atom suvosti kemasidir.
U «Losharik» nomini 1971 yildagi sovet multfilmi qahramoni bo‘lmish shishiriladigan sharlardan yasalgan toychoqdan olgan. AS-12 atom suvosti kemasi bir-biri bilan bog‘langan bir qancha titan sferalardan iborat.
