Afg‘onlararo muloqot bo‘yicha Samarqand uchrashuvining aniq sanasi qachon e'lon qilinishi ochiqlandi

O‘zbekiston Dohadagi afg‘onlararo konferensiya qarorini va uning ishtirokchilari tomonidan qabul qilingan Tinchlik to‘g‘risidagi qo‘shma rezolyutsiyani qo‘llab quvvatlaydi. Bu haqda Tashqi ishlar vazirligi bayonotida aytilgan.

Qayd etilishicha, O‘zbekiston tomoni inklyuziv afg‘onlararo muloqotning navbatdagi raundini Samarqand shahrida o‘tkazish uchun zarur shart-sharoitlarni yaratishga tayyorligini yana bir bor tasdiqlaydi va bo‘lajak muzokaralar muvaffaqiyatli bo‘lishiga umid bildiradi.

Samarqand uchrashuvi o‘tkazilishining aniq vaqti afg‘onlararo muzokaralarning barcha ishtirokchilari bilan kelishilganidan so‘ng e'lon qilinishi aytiladi.

O‘zbekiston tomoni Afg‘onistondagi siyosiy jarayon faqat afg‘on xalqi va uning rahbarligida amalga oshirilishi zarurligi to‘g‘risidagi o‘zining prinsipial mavqeini tasdiqlagan.

Bundan oldin, «Tolibon» O‘zbekistondagi afg‘onlararo uchrashuvga taklifnoma olmagani xabar qilingandi.