Joylardagi tibbiyot muassasalari silni erta aniqlashda qo‘llaniladigan preparat bilan to‘liq ta'minlanmagani ma'lum bo‘ldi

Joriy yilning 26 iyul kuni Oliy Majlis Qonunchilik palatasining Fuqarolarning sog‘lig‘ini saqlash masalalari qo‘mitasi Respublika ixtisoslashtirilgan ftiziatriya va pulmonologiya ilmiy-amaliy tibbiyot markazi rahbarining “Aholiga ftiziatriya va pulmonologiya xizmatini ko‘rsatishning holati to‘g‘risida”gi axborotini eshitdi.

Ta'kidlanishicha, sil kasalligiga chalingan bemorni 2 soat ichida aniqlash imkonini beradigan besh tabaqali laboratoriya tizimi yo‘lga qo‘yilgan. Toshkent, Nukus va Samarqand shaharlarida xalqaro sertifikatga ega bo‘lgan, jahondagi kuchli o‘nta laboratoriyalar safiga kirgan Milliy referens laboratoriyalari faoliyat ko‘rsatmoqda. Faol sil jarayonini aniqlash maqsadida “Diaskin test” usuli amaliyotga tadbiq qilingan. Shuningdek, Jahon sog‘liqni saqlash tashkilotining tavsiyasiga ko‘ra, latent sil bilan og‘rigan shaxslarni vaqtida aniqlash va profilaktik choralar ko‘rish uchun tuberkulin diagnostika yo‘lga qo‘yilgan. Natijada, 2018 yil yakuni bo‘yicha sil bilan kasallanish 2017 yilga nisbatan 4,5 foizga, 2015 yilga nisbatan 9 foizga kamaygan.

Shu bilan birga, sohada amalga oshirilgan ijobiy ishlar bilan bir qatorda, qilinishi lozim bo‘lgan ko‘plab vazifalar turgani, o‘z yechimini kutayotgan ayrim muammolar mavjudligiga e'tibor qaratildi. Masalan, joylardagi tibbiyot muassasalari sil kasalligini erta aniqlash maqsadida qo‘llaniladigan tuberkulin preparati bilan to‘liq ta'minlanmagan, tashkil etilgan hududlararo bakteriologik laboratoriyalarning moddiy-texnik bazasi va shtat me'yorlari bugungi kun talabiga to‘la javob bermaydi, hududlardagi silga qarshi muassasalarida sohaning tor yo‘nalishdagi mutaxassislariga ehtiyoj yuqoriligi aytib o‘tildi.

Yig‘ilishda O‘zbekiston Respublikasi Innovatsion sog‘liqni saqlash milliy palatasi, Sog‘liqni saqlash, Moliya, Iqtisodiyot, Tashqi ishlar, Investitsiyalar va tashqi savdo vazirliklariga aholiga ko‘rsatilayotgan ftiziatriya va pulmonologiya xizmatini takomillashtirish borasida amalga oshirilishi belgilangan vazifalarda hamkorlikni kuchaytirish yuzasidan takliflar berildi. Shuningdek, joylarda faoliyat yuritayotgan Referens laboratoriyalari faoliyatini takomillashtirish yuzasidan tavsiyalar tayyorlanib, O‘zbekiston Respublikasi Vazirlar Mahkamasiga yuboriladigan bo‘ldi. Ushbu masalalarni aks ettirgan va sohadagi muammolarni bartaraf etishga qaratilgan amaliy tavsiyalar qo‘mitaning tegishli qarorida aks etdi.