Hukumat qarori: Qamashi tumani kompleks rivojlantiriladi

Qamashi tumanida ishsiz aholini ish bilan ta'minlash va xonadonlarda qishloq xo‘jaligi mahsulotlarini yetishtirishni ko‘paytirish maqsadida:

tumanda kurkachilik sohasini rivojlantirish bo‘yicha istiqbolli loyihani amalga oshirish hamda 2019-2020 yillarda kurkalar sonini 1 mln. boshga yetkazish maqsadida “O‘zsanoatqurilishbank” ATB tomonidan 6 000 xonadonga 600 ming bosh kurka yetishtirish uchun imtiyozli kreditlar ajratilishini ta'minlaydi va shu maqsadda tumanda minibank ochish tavsiya etildi;

“Parrandasanoat” uyushmasi “O‘zsanoatkurilishbank” ATB bilan birgalikda 2019 yilda Qamashi tumanida yangidan 3 ta kurkachilik agrofirmasini tashkil etish bo‘yicha chora-tadbirlar ishlab chiqadi;

Veterinariya va chorvachilikni rivojlantirish davlat qo‘mitasi, Qashqadaryo viloyati hokimligi 2019-2020 yillarda Qamashi tumanida chorvachilikka ixtisoslashtirilgan xo‘jaliklar tomonidan aholi xonadonlariga AT “Xalq banki” tomonidan ajratiladigan imtiyozli kreditlari hisobidan chet eldan 2 ming bosh naslli chorva mollari olib kelinishini ta'minlaydi;

tumanda quyonchilik sohasini rivojlantirish va quyonlar sonini ikki barobarga oshirish maqsadida 2019-2020 yillarda “Mikrokreditbank” ATB tomonidan 3 000 xonadonga 40 ming bosh quyon sotib olish uchun imtiyozli kredit ajratadi.

O‘zbekiston Respublikasi Madaniyat vazirligi Qashqadaryo viloyati hokimligi bilan birgalikda tashabbuskor tadbirkorlar mablag‘lari va Tashqi iqtisodiy faoliyat milliy banki imtiyozli kredit liniyasi hisobidan tumanda zamonaviy istirohat bog‘i tashkil etilishini ta'minlaydi.

O‘zbekiston Respublikasi Avtomobil yo‘llari qo‘mitasi respublika budjeti hisobidan tuman hududidagi Maydanak observatoriyasiga olib boruvchi avtomobil yo‘lini 2019 yilda to‘liq ta'mirlashni yakuniga yetkazishni ta'minlaydi.

O‘zbekiston Respublikasi Avtomobil yo‘llari qo‘mitasi, Qashqadaryo viloyati hokimligi, Qamashi tuman hokimligi tuman hududidan o‘tuvchi xalqaro va mahalliy ahamiyatga ega avtomobil yo‘llarini rekonstruksiya qilish hamda ta'mirlash ishlarini o‘z vaqtida va sifatli bajarilishini ta'minlaydi.

O‘zbekiston Respublikasi Qurilish vazirligi Madaniyat vazirligi bilan birgalikda uch oy muddatda tumandagi XV asrga oid “Langar ota” ziyoratgohi va “Langar ota” masjidini ta'mirlash, hududini obodonlashtirish va ko‘kalamzorlashtirish konsepsiyasini ishlab chiqib, Vazirlar Mahkamasiga kiritadi.

O‘zbekiston Respublikasi Moliya vazirligi Investitsiyalar va tashqi savdo vazirligi bilan birgalikda ushbu obektlar bo‘yicha ta'mirlash ishlarini moliyalashtirish respublika budjeti mablag‘lari hisobidan amalga oshirilishini ta'minlaydi.

O‘zbekiston Respublikasi Investitsiyalar va tashqi savdo vazirligi, Iqtisodiyot va sanoat vazirligi, Moliya vazirligi har yili O‘zbekiston Respublikasining Investitsiya dasturini shakllantirishda ushbu qarorda nazarda tutilgan markazlashgan manbalar mablag‘lari hisobidan moliyalashtiriladigan, shu jumladan hududlar va iqtisodiyot tarmoqlarini rivojlantirish bo‘yicha loyihalar inobatga olinishini ta'minlaydi.

Qashqadaryo viloyati hokimligi O‘zbekiston Respublikasi Yer resurslari, geodeziya, kartografiya va davlat kadastri davlat qo‘mitasi bilan birgalikda Dasturga kiritilgan investitsiya loyihalarining amalga oshirilishi uchun yer uchastkalarini belgilangan tartibda ajratadi.

“O‘ztransgaz” AJ, “Hududiy elektr tarmoqlari” AJ Qashqadaryo viloyati hokimligi bilan birgalikda Dastur doirasida investitsiya loyihalarini amalga oshiruvchi ishlab chiqarish korxonalarining tabiiy gaz va elektr uzatish tarmoqlariga o‘rnatilgan tartib va muddatlarda o‘z vaqtida ulanishini hamda ularga mavjud resurs va texnik imkoniyatlardan kelib chiqib, tabiiy gaz va elektr energiyasi yetkazib berilishini ta'minlaydi.