Transferlar darchasi hali yopilmadi, ammo ko‘plab klublar tarkibini yangilab, mavsum oldidan yakuniy ko‘rinishga keltirishga ulgurdi. Ayniqsa bu Angliya klublariga tegishli, Tumanli albionda chempionat shu uik-enddayoq start oladi va shundan keyin bu klublar futbolchi sotib ololmaydi. Quyida yozgi transferlar boshlanganidan buyon yangi futbolchilar uchun eng ko‘p pul sarflagan 10 klub keltiriladi, bu klublar jami bo‘lib 1,5 mlrd yevrodan ko‘proq pul sarflashgan. Bu ro‘yxatdagi ayrim nomlar futbol muxlislarini hayron qoldirishi ham mumkin.
10. «Arsenal», 117 mln yevro
Kutilmagan holat: «Arsenal» va qimmatbaho xaridlar? Ammo londonliklar ham katta xarajat qila olarkan, buni «Lill»dan 80 mln yevroga sotib olingan Nikolya Pepe transferi isbotladi. Bu kelishuvning moliyaviy jihatlari to‘liq oshkor etilmadi, ammo bu pul fransuzlarga bir necha yil davomida bo‘lib-bo‘lib to‘lanadi. «Real»dan Dani Sebalosning ijaraga olinishi ham tarkibni jiddiy kuchaytirdi. Yana 30 million yevro Vilyam Saliba uchun sarflandi, ammo o‘ng qanot himoyasida harakatlanuvchi bu futbolchi oldindagi bir mavsumni o‘zining sobiq klubi «Sent-Eten»da ijara asosida o‘tkazadi. Jamoaga hali yana himoyachi kerak, ikkita bo‘lsa yana yaxshi. Klubning faxriy futbolchilaridan biri, sardor Loran Koselni «Bordo»ga o‘tmoqda, shuningdek, Shkodran Mustafi ham klubni tark etishi mumkin.
9. «Bavariya», 118 mln yevro
«Bavariya»ning ziqna xo‘jayinlari ham pul sarflashga kirishdi va myunxenliklar ko‘p pul sarflaydigan klublar reytingidan joy oldi. Robben va Riberining ketishi bunga asosiy sabablardan biri, ularning o‘rnini to‘ldirish va yangi davrga qadam qo‘yish kerak, hozircha myunxenliklar hujumida qanotlarda faqat Kingsli Koman va Serj Gnabri bor. Lekin mudofaa chizig‘i jiddiy kuchaytirildi: Benjamen Pavar 35 mln yevroga, Lyuka Ernandes 80 mln yevroga sotib olindi, ular kamida Dortmundning «Borussiya» klubiga qaytgan Mats Hummels o‘rnini to‘ldirishi, maksimum esa – Kimmix va Alaba jarohat olgan taqdirda, ularning o‘rnini yopishi talab etiladi. Yangi futbolchilar markazda ham, qanotlarda ham harakatlana olishadi. So‘nggi xabarlarga ko‘ra, klub qanotni kuchaytirish uchun «Manchester Siti» vingeri Leroy Saneni sotib olish bo‘yicha muzokaralar olib bormoqda. Agar bu transfer amalga oshsa, myunxenliklar mazkur ro‘yxatning yuqori qismiga joylashadi: «Manchester Siti» o‘zining germaniyalik futbolchisini faqat 120 mln yevrodan ko‘proq narxga sotishga rozi bo‘ladi.
8. «Sevilya», 124 mln yevro
«Sevilya» — odatda o‘z futbolchilarini qimmatga sotib olib, kuchsiz chempionatlardan arzonroq futbolchilar sotib olish bilan shug‘ullanadigan klublardan biri edi. Ammo hozir klubda global qayta qurish davri ketmoqda: klubga sport direktori Monchi qaytgan, Ispaniya terma jamoasining sobiq bosh murabbiyi Xulen Lopetegi klub boshqaruviga olib kelingan, tarkib esa radikal darajada o‘zgarmoqda. Asosiy sotuvlar: Promes, Sarabiya va Muriel birgalikda klubga 50 mln yevroga yaqin mablag‘ keltirdi. Endi xaridlar haqida: chap qanot vingeri Lukas Okampos (15 mln yevro), ikki nafar markaziy hujumchi – Lyuk de Yong va Munas Dabbur (15 va 12 mln yevro), Xitoydan Nemanya Gudel erkin agent sifatida keldi, o‘z vaqtida «Siti»da o‘ynagan Fernando 5 mln yevroga transfer qilindi. «Sevilya»ning transfer strategiyasidagi jiddiy o‘zgarishni payqash qiyin emas: endi klub tajribali futbolchilarga ishonch bildirmoqda. Ammo talantli va yosh futbolchilar ham transfer qilindi: ikkita yosh markaziy himoyachi («Bordo»dan Jyul Konde va «Ayaks»dan Maks Veber uchun 35 mln berildi. Umuman, «Sevilya» ko‘p pul sarfladi va yangi tarkibga ega bo‘ldi. Bu tarkib qanday o‘ynarkan?
