Qizilmiyani o‘rganish bo‘yicha O‘zbekiston-Xitoy ilmiy-tadqiqot markazi ochiladi

Joriy yilning 15 avgust kuni Farmatsevtika tarmog‘ini rivojlantirish agentligi yetakchi mutaxassislari Xitoyning Shaanxi YuanZheng Investment Group CO.Ltd farmatsevtika kompaniyasi rahbariyati va vakillari bilan uchrashdilar. 

Agentlik xabariga ko‘ra, uchrashuvda ikki tomon qator masalalar muhokamasi o‘tkazildi. O‘zbekiston Respublikasida qizilmiya o‘simligini yetishtirish va qayta ishlash bo‘yicha qo‘shma korxona tashkil etish shular jumlasidan.

O‘zbekistonda qulay sarmoyaviy muhit mavjudligini hisobga olgan holda, kompaniya qizilmiya o‘simligini yetishtirish va qayta ishlash korxonasini qurish uchun dastlabki 10 million AQSh dollari miqdorida mablag‘ sarflashni rejalashtirmoqda, shuningdek, bir nechta jarayonni o‘z ichiga oluvchi klaster yaratishni ham mo‘ljallagan, ya'ni qizilmiya o‘simligini yetishtirishdan tortib qayta ishlash, tayyor mahsulot ishlab chiqarish va chiqindilardan ikkilamchi mahsulot ishlab chiqarish. 

Bundan tashqari, O‘zbekiston Respublikasi hududida o‘sadigan dorivor o‘simliklarni, jumladan qizilmiyani o‘rganish bo‘yicha O‘zbekiston-Xitoy ilmiy-tadqiqot markazini ham ochish rejalar qatoridan o‘rin olgan. Istiqbolda kadrlar almashinuvini ham yo‘lga qo‘yish maqsad qilinmoqda.

Uchrashuv yakunida, hamkorlikni mustahkamlash va yanada kengaytirish maqsadida Farmatsevtika tarmog‘ini rivojlantirish Agentligi va Shaanxi YuanZheng Investment Group CO.Ltd kompaniyasi o‘rtasida o‘zaro Anglashuv memorandumi va hamkorlik bitimi imzolandi, deyiladi xabarda.