11 sentyabrga o‘tar kechasi AQShning Kobuldagi elchixonasi oldida kuchli portlash yangradi. Bu haqda o‘z manbalariga iqtibos keltirgan holda “Sinxua” axborot agentligi xabar berdi.
Ma'lum qilinishicha, portlashdan keyin elchixonada signalizatsiya ishga tushgan. Ayni vaqtda qurbonlar yoki jabrlanganlar haqida ma'lumot yo‘q.
Ta'kidlanishicha, portlashga raketa hujumi sabab bo‘lgan.
Hozircha rasmiy shaxslardan ushbu voqea yuzasidan hech qanday izoh berilmagan. Hududda harakatlanuvchi ekstremistik guruhlardan birortasi hujum uchun javobgarlikni o‘z zimmasiga olmagan
Portlash Tramp Kobuldagi boshqa bir terakt sababli 7 sentyabrda “Tolibon” yetakchilari hamda Afg‘oniston prezidenti bilan uchrashuvni bekor qilganini e'lon qilgandan keyin sodir etildi. Uchrashuv Kemp-Devidda 8 sentyabrda bo‘lib o‘tishi kerak edi. Bundan tashqari, Tramp Afg‘onistonda tinchlikka erishish bo‘yicha muzokaralar ham to‘xtatilishini ma'lum qilgan.
Bunga javoban “Tolibon” AQSh Afg‘onistonda yanada ko‘proq qurbonlarga uchrashi bilan tahdid qilgan.
Ta'kidlash joiz, hujum 11 sentyabrda “Al-Qoida”ning Nyu-Yorkdagi Jahon savdo markazi binolariga hujumining 18 yilligida sodir etildi.
