O‘zbekiston BMTning yo‘l harakati bo‘yicha Trast fondi doirasidagi amaliy hamkorlikka qiziqish bildirdi

2019 yilning 19 sentabr kuni O‘zbekiston Respublikasi tashqi ishlar vaziri Abdulaziz Komilov BMT bosh kotibining yo‘l harakati xavfsizligi masalalari bo‘yicha maxsus vakili Jan Todtni qabul qildi.

Vazir mehmonni qutlab, uning BMT bosh kotibining yo‘l harakati xavfsizligi masalalari bo‘yicha ilk vakili sifatidagi faoliyatini va mazkur yo‘nalishdagi global sheriklikni qo‘llab-quvvatlash borasidagi sa'y-harakatlarini yuqori baholadi.

Bo‘lib o‘tgan suhbat chog‘ida barqaror transport infratuzilmasini yaratish, yo‘l harakati xavfsizligi sohasi qonunchiligini va huquqni qo‘llash tizimini takomillashtirish kabi muhim jabhalardagi hamkorlikning istiqbollari muhokama qilindi.

Shu o‘rinda O‘zbekiston tomoni BMTning yo‘l harakati sohasidagi loyihalarni moliyalashtirishga yo‘naltirish va ularni amalga oshirishga yo‘naltirilgan Trast fondi tuzilishini qo‘llab-quvvatladi, Fond doirasidagi amaliy hamkorlikka qiziqish bildirdi.