Prezident Shavkat Mirziyoyev Qoraqalpogʻiston Respublikasiga tashrifi davomida 18-sentabr kuni Nukus shahridagi rekonstruksiya qilingan «Turon» stadioni bilan tanishdi.
Loyihaning umumiy qiymati 118,6 milliard soʻmni tashkil etadi. Majmuada 85 nafar kishining doimiy bandligi taʼminlandi. Rekonstruksiya natijasida stadion sigʻimi 9,3 mingdan 12 ming oʻringa yetkazildi.
«Turon» stadioni «Aral» professional futbol klubining bazasi hisoblanadi. Bu yerda Respublika futbol akademiyasining 190 nafar tarbiyalanuvchisi muntazam mashgʻulotlar va oʻquv yigʻinlarini oʻtkazmoqda. Majmuada ikkita sport zali va ikkita qoʻshimcha stadion ham mavjud.
Akademiya tarbiyalanuvchilari uchun 196 oʻrinli yotoqxona, 84 oʻrinli oshxona, trenajyor zallari va taktik tahlil xonalari tashkil etilgan. Shuningdek, yengil atletika, boks va taekvondo boʻyicha bir vaqtning oʻzida 100-150 nafar sportchining shugʻullanishi uchun sharoit yaratilgan.
Stadionda ommaviy axborot vositalari uchun maxsus platformalar, ofsayd kameralarini oʻrnatish nuqtalari hamda markazlashgan VAR tizimi uchun alohida zona tashkil etildi. Mazkur infratuzilma musobaqalarni yuqori saviyada oʻtkazish va yoritishga xizmat qiladi.
Davlat rahbari majmuadagi sharoitlar bilan tanishib, Qoraqalpogʻistonda sportni, xususan, futbolni rivojlantirish boʻyicha tavsiya va koʻrsatmalar berdi.
Prezidentimiz shu yerda mashgʻulot oʻtayotgan yosh sportchilar bilan samimiy suhbatlashdi va ular bilan esdalik uchun suratga tushdi.
