Olimlar koʻpincha kelasi oʻn yilliklarga moʻljallangan iqlim maqsadlari haqida gapiradi, shu bois dunyoda global isishning eng ogʻir oqibatlarini toʻxtatish uchun hali vaqt bordek tuyulishi mumkin. Ammo BMT yangi hisobotida bu fursat allaqachon boy berilgani qayd etilgan. Sanoatlashuvdan oldingi davrga nisbatan haroratning 1,5 darajaga oshishi muqarrar va bu yaqin yillarda sodir boʻladi.
Ushbu meyor uzoq vaqtdan beri iqlimdagi xavfli burilish nuqtalari bilan bogʻlanadi. Gap okean oqimlarining buzilishi, abadiy muzliklarning jadal erishi va tropik marjon riflarning yoʻq boʻlib ketishi haqida bormoqda. Bularning barchasi sayyoradagi hayotni oʻzgartirib yuborishi mumkin boʻlgan ortga qaytmas oqibatlar sanaladi.
Aksariyat tadqiqotchilarning hisob-kitoblariga koʻra, dunyoda hozir harorat taxminan 1,4 darajaga oshgan. Agar iqlim boʻyicha berilgan barcha vaʼdalar bajarilgan taqdirda ham, BMT harorat kamida 1,8 darajagacha koʻtarilishini bashorat qilmoqda. Hozirgi siyosat saqlanib qolsa, asr oxiriga borib isish 2,6 darajaga yetishi mumkin.
Bunday ssenariy muqarrar deb hisoblanmaydi, biroq u ancha qatʼiy choralarni talab etadi. BMT 1,5 darajalik maqsadga yuqori chegara sifatida emas, balki kelajakda saqlab qolinishi zarur boʻlgan minimal daraja sifatida qarashni taklif qilmoqda. Buning uchun dunyo asrning ikkinchi yarmida karbonat angidrid (CO2) chiqarishni barqaror ravishda kamaytirishga erishishi va boshqa issiqxona gazlarini qoʻshimcha ravishda qisqartirishi kerak boʻladi.
Hisobot mualliflari hozir qabul qilinayotgan qarorlar global isishni 1,5 daraja atrofida ushlab turish imkoniyati qolishi yoki qolmasligini belgilab berishini taʼkidlamoqda.
BMT Atrof-muhit dasturi ijrochi direktori Inger Andersen CBC News nashriga bergan intervyusida bu maqsad oʻz dolzarbligini yoʻqotmaganini aytdi. Uning soʻzlariga koʻra, haroratning har oʻndan bir darajasini pasaytirish orqali kelajakdagi zararni kamaytirish mumkin.
