Vladimir Norov: «Xitoy-Qirg‘iziston-O‘zbekiston temir yo‘li transport tarmog‘ining muhim bo‘g‘iniga aylanadi» 

Toshkent shahrida Shanxay hamkorlik tashkilotiga a'zo davlatlar hukumat rahbarlarining uchrashuvi bo‘lib o‘tmoqda.

Kun.uz muxbirining xabar qilishicha, tadbirda ShHT bosh kotibi Vladimir Norov so‘zga chiqib, quyidagi fikrlarni bildirdi:

“Xitoy-Qirg‘iziston-O‘zbekiston temir yo‘lining qurilishi istiqbolda transport tarmog‘ining muhim bo‘g‘iniga aylanadi, deb hisoblaymiz. Mintaqaviy magistrallarni qurishda ShHT Afg‘oniston aloqa guruhi imkoniyatlaridan foydalangan holda Afg‘onistonni ham jalb etish muhim.

ShHT hududi raqamlashtirish, telekommunikatsiya texnologiyalari va ishlab chiqarishning yangi texnologiyalari, robototexnika, sun'iy idrok kabi sohalarda yetakchi o‘rinni egallashi lozim. 

Elektron savdo hajmining milliy, mintaqaviy va global darajalarda faol o‘sishini hisobga olib, ShHT doirasida ana shu istiqbolli yo‘nalishda hamkorlik dasturini qabul qilish masalasi yuzaga keldi.  

Turizm ijtimoiy-iqtisodiy rivojlanishning muhim omiliga aylandi. Smart turizm, onlayn to‘lovlar, madaniy obektlar raqamlashtirilishining tatbiq etilishi ShHT mamlakatlarida turizm sanoatini rivojlantirishda qo‘shimcha turtki bo‘lib xizmat qiladi”, - dedi Norov.

Bundan oldin, Toshkentda ShHT hukumat rahbarlari kengashi yig‘ilishi bo‘lib o‘tayotgani xabar berilgandi.