Yuzlab aviareyslar vaqti o‘zgardi, yuk mashinalari harakati to‘xtatildi – Koreyada imtihon kuni qanday o‘tdi?

Kecha, 14 noyabr – Janubiy Koreyada yilning eng hayajonli kuni bo‘ldi: yuqori sinf bitiruvchilari oliygohlarga kirish imtihonini topshirishdi.

Kollej ta'limiga munosiblikni tekshirish testi (CSAT – College Scholastic Ability Test) deb nomlanuvchi davlat imtihoni yoshlar hayotida eng muhim voqeadir. Payshanba kuni Koreyaning 1185ta maktabida abituriyentlar soat 8:40dan 16:30gacha imtihon topshirishdi.

Koreys xalqi yoshlarni imtihon vaqtida qo‘llab-quvvatlashni juda muhim deb hisoblaydi. Ta'lim vazirligi rahbarlari, shahar merlari va boshqa amaldorlar bo‘lajak talabalarga omad tilash maqsadida imtihondan avval ular bilan uchrashadilar.

Davlat imtihonining shaffof va tinch o‘tishi qattiq nazorat qilinadi. 

Quyida Janubiy Koreyadagi davlat imtihonlari haqidagi ayrim qiziqarli faktlar keltirib o‘tiladi.

• Imtihon kuni o‘quvchilar hech nima olib kirishmaydi. Hatto ruchka ham. Barcha kerakli o‘quv qurollari, tinglash vositalari xonada tayyorlangan bo‘ladi.
• Bu kunda samolyotlarning uchish-qo‘nish harakati to‘xtatiladi. Kecha imtihon sababli 158ta reysning vaqti ko‘chirildi. Ulardan 40tasi – xalqaro reyslar.
• Transport vositalarining signal berishi, ortiqcha shovqin solishi taqiqlanadi. Katta yuk mashinalarining harakatlanishi to‘xtatib turiladi.

• Maktablar atrofidagi katta qurilish ishlari ham to‘xtatib turiladi.
• Bolalarning imtihonga kechikmay, o‘z vaqtida yetib kelishi uchun davlat ishxonalari, do‘konlar, bank va boshqa muassasalarning ish vaqti kech boshlanadi.

• Ingliz tili yoki boshqa til fanlaridan «Listening» (tinglash) bo‘yicha savollarni yechish uchun xonada maksimal darajada tinchlik va sukunat saqlanishi kerak. O‘quvchilar savolni to‘liq eshitishi uchun har biriga alohida quloqchinlar beriladi.
• Politsiya xodimlarining mashinalari va maxsus posbonlarning mototsikllari kechga qolayotgan o‘quvchilarni olib borib qo‘yish uchun har bir hududda tayyor turishadi. 

• Imtihon davomida reportyor, jurnalistlarning suratga olishlari mumkin emas.
• Kechagi davlat imtihoni har doimgidek qat'iy qoidalarga amal qilingan holda yakunlandi. O‘quvchilar endi imtihon natijalarini taxminan 10 dekabrda bilishlari mumkin.

Koreya yoshlari uchun imtihon – bu qandaydir «bunkerlar o‘yini» yoki tasodifiy omad emas, balki hayot-mamot masalasidir. Imtihondan yiqilish bolaning taqdiriga katta ta'sir ko‘rsatadi. Shu sababli Janubiy Koreya yoshlarning o‘z joniga qasd qilishi bo‘yicha Iqtisodiy hamkorlik va taraqqiyot tashkiloti (OECD) davlatlari orasida 1-o‘rinda turadi.

Shu boisdan har bir bola o‘z bilimi yeta oladigan oliy o‘quv yurtiga hujjat topshirib, talaba bo‘lishni istaydi. Shuningdek, farzandning yutug‘i ota-ona uchun ham juda muhim rol o‘ynaydi. O‘qishga kirish – bu oila g‘ururi, manfaati va porloq kelajakning ta'minlanganidir.

Feruza Avazova,
Kun.uz muxbiri.