Mutaxassislar dars bermasa, yoshlar chalasavod bo‘lib qoladi – Mansur Toshmatov

O‘zbekiston akademik va xalq badiiy jamoalari direksiyasi badiiy rahbari, xalq artisti Mansur Toshmatov fikricha, san'at sohasidagi o‘quv yurtlarida o‘qituvchilar mutaxassis bo‘lishi shart, bo‘lmasa yoshlar chalasavod bo‘lib qoladi. U bu haqda Davlat boshqaruvi akademiyasida o‘tkazilgan “Yangilanayotgan jamiyatda yoshlarning ijtimoiy faolligi: muammo va yechimlar” mavzusidagi konferensiyada aytib o‘tdi.

“San'at sohasidagi o‘quv yurtlarida o‘qituvchilar mutaxassis bo‘lishi shart. Mutaxassis bo‘lmaganlar dars bersa, yoshlarimiz chalasavod bo‘lib qoladi. Hozir ham chalasavod ko‘pchiligi. Avvalambor, o‘qituvchi-ustozlarning saviyasiga ahamiyat berish kerak”, deya Mansur Toshmatovning so‘zlaridan iqtibos keltirmoqda Kun.uz muxbiri.

Xalq artisti bugungi kunda yoshlar ko‘proq ingliz tilida gaplashayotgani, so‘zlashuvda inglizcha so‘z, atamalar urf bo‘layotganiga ham to‘xtalib o‘tdi.

“Hozir inglizcha so‘zlarni ko‘p qo‘llayapmiz, ular leksikamizga kirib ketdi. Biz o‘qigan maktablarimizni, o‘qigan kitoblarimizni, saviyamizni, dunyoqarashimizni yomon, deb aytolmayman. Shuning uchun men o‘ylaymanki, yoshlarni tarbiyalayotganimizda sal tarixga ham qarab, o‘zimizga, bizning muhitga, mentalitetimizga to‘g‘ri keladigan yo‘nalishni topishimiz kerak”, - deb aytgan Mansur Toshmatov.

Eslatib o‘tamiz, avvalroq Mansur Toshmatov nomutaxassis san'atkorlar «O‘zbekkonsert»ga pulini to‘lab, litsenziya olishi va sahnaga chiqib ketaverishi, qo‘shiqlari televideniyeda aylanishini tanqid qilgandi.