Un va non sotib olish bo‘yicha oylik pul kompensatsiya qachon to‘lanadi?

Un va non mahsulotlari narxlari erkinlashtirilishi natijasida aholining ehtiyojmand qatlamlarining yuzaga keladigan qo‘shimcha xarajatlarini qoplash, shuningdek, aholining ijtimoiy himoyaga muhtoj qatlamlarini qo‘llab-quvvatlash maqsadida to‘lanib kelinayotgan kompensatsiya oshirildi.

Soliq plus’ning yozishicha:

yoshga doir pensiya, nogironligi bo‘yicha nafaqa, boquvchisini yo‘qotganlik pensiyasi va nafaqasi (har bir boqimandaga), bolalikdan nogiron bo‘lgan 16 yoshdan katta shaxslarga nafaqa, 16 yoshgacha bo‘lgan nogiron bolalar va 18 yoshga to‘lmagan OIV infeksiyasiga chalingan shaxslarga nafaqa hamda belgilangan eng kam yoshga doir pensiyaning miqdoridan kam pensiya oluvchilar;

ikki yoshgacha bo‘lgan bola parvarishi uchun tayinlangan nafaqa va moddiy yordam oluvchi oilalarga beriladigan har oylik pul kompensatsiyasi 2019 yil 1 oktyabrdan boshlab 22,3 ming so‘mdan 50 ming so‘mga oshirildi.

Shuningdek, aholining ijtimoiy himoyaga muhtoj qatlamini yanada qo‘llab-quvvatlash maqsadida, pul kompensatsiyasi oluvchilarining amaldagi 9 toifasiga qo‘shimcha ravishda 14 yoshgacha bo‘lgan bolalari uchun tayinlangan nafaqa oluvchi oilalar va belgilangan eng kam yoshga doir pensiya miqdorida pensiya oluvchilar kiritilib, 2019 yil 1 oktyabrdan boshlab, 50 ming so‘m miqdorida har oylik pul kompensatsiyasi joriy etildi.

Ushbu qarorda belgilanishicha, kompensatsiya to‘lovlari shu yilning 1 oktyabridan oshirilishini inobatga olgan holda, yoshga doir pensiya, nogironligi bo‘yicha nafaqa, boquvchisini yo‘qotganlik pensiyasi va nafaqasi (har bir boqimandaga), bolalikdan nogiron bo‘lgan 16 yoshdan katta shaxslarga nafaqa, 16 yoshgacha bo‘lgan nogiron bolalar va 18 yoshga to‘lmagan OIV infeksiyasiga chalingan shaxslarga nafaqa hamda belgilangan eng kam yoshga doir pensiyaning miqdoridan kam pensiya oluvchilarga pul kompensatsiyalari miqdori oktabr oyi uchun Pensiya jamg‘armasining axborot tizimida avtomatik tarzda qayta hisoblanadi hamda oshirilgan miqdorlar farqi bo‘yicha kompensatsiyaning qo‘shimcha to‘lov reyestrlari tuzilgan holda tijorat banklari va Xalq banki filiallari tomonidan to‘lab beriladi.

Ya'ni, oktabr oyi uchun 22 300 so‘m to‘lov vedomostlariga kiritilgan bo‘lsa, joriy oy uchun qo‘shimcha ravishda 27 700 so‘m, jami 50 000 so‘m (22 300+27 700=50 000) to‘lanadi. Shuningdek, noyabr oyidan boshlab, har oyda 50 000 so‘mdan kompensatsiya to‘lovlari amalga oshirib boriladi.

O‘z-o‘zini boshqarish organlari tomonidan tayinlangan bola ikki yoshga to‘lgunga qadar bola parvarishi bo‘yicha nafaqa va moddiy yordam oluvchi oilalar har oylik pul kompensatsiyasi oktabr oyi uchun qayta hisob-kitob qilinib, noyabr oyida to‘lanishi ta'minlanadi.

Ya'ni, oktabr oyida 22 300 so‘m to‘lanadi hamda oktabr oyi uchun 27 700 so‘mlik farq noyabr oyi kompensatsiyasiga qo‘shib jami 77 700 so‘m (50 000+27 700=77 700) to‘lanadi. Shuningdek, dekabr oyidan har oyda 50 000 so‘mdan kompensatsiya to‘lovlari amalga oshiriladi.

Kompensatsiya oluvchilar toifasiga yangi kiritilgan 14 yoshgacha bolalari bo‘lgan oilalarga nafaqa hamda eng kam yoshga doir pensiya miqdorida pensiya oluvchilariga shu yilning oktabr oyi uchun kompensatsiyalar noyabr oyida qo‘shib to‘lanadi.

Ya'ni, oktabr oyi uchun hisoblangan 50 000 so‘m kompensatsiya noyabr oyiga qo‘shilib, jami 100 000 so‘m (50 000+50 000=100 000) to‘lanadi. Shuningdek, dekabr oyidan har oyda 50 000 so‘mdan kompensatsiya to‘lovlari davom ettiriladi.

– Kompensatsiyalarni tayinlash yoki miqdorlarini qayta hisoblash (oshirish) uchun fuqarolar tomonidan qo‘shimcha hujjat yoki arizalar talab etilmaydi. Kompensatsiyalarni oshirilgan miqdorlarda to‘lash hamda yangi toifalarga kompensatsiyalarni joriy qilish bilan bog‘liq xarajatlar O‘zbekiston Respublikasining Davlat budjeti mablag‘lari hisobidan amalga oshiriladi, – deydi Pensiya jamg‘armasi bo‘lim boshlig‘i o‘rinbosari M.O‘rinboyev.

Statistik ma'lumotlarga ko‘ra, Moliya vazirligi huzuridagi Budjetdan tashqari Pensiya jamg‘armasining tuman (shahar) bo‘limlarida, 2019 yil 1 oktabr holatiga pensiya va ijtimoiy nafaqa oluvchilarning umumiy soni – 3 631 143 nafarni tashkil etdi. Shundan yoshga doir pensiya oluvchilar – 2 718 717 nafar, nogironlik pensiyasini oluvchilar – 379 387 nafar, boquvchisini yo‘qotganlik uchun pensiya oluvchi oilalar – 176 990 ta, ijtimoiy nafaqa oluvchilar – 356 049 nafarni tashkil etadi.

O‘zgartirishlarga muvofiq tashkilot tomonidan Pensiya jamg‘armasining tuman (shahar) bo‘limiga moliyalashtirish maqsadida mablag‘lar olish uchun taqdim etiladigan hujjatlarda kompensatsiya to‘g‘risidagi ma'lumotlar aks ettiriladi:

Pensiya jamg‘armasidan tegishli oy uchun xarajatlarga to‘lash uchun mablag‘ olishga talabnomada (qog‘oz ko‘rinishida) kompensatsiya oluvchilar soni va haqiqiy xarajatlar, shu jumladan, oldingi davr uchun shunday ma'lumotlar so‘mda ko‘rsatiladi;

elektron talabnomada – joriy va oldingi davrlar uchun kompensatsiya summasi (talabnoma tanlov bo‘yicha: qog‘oz ko‘rinishida yoki elektron shaklda taqdim etiladi).

Pensiya jamg‘armasidan tegishli oy uchun pensiya va nafaqalarni to‘lash maqsadida mablag‘lar olish uchun tashkilot xodimlari reyestrida kompensatsiya to‘g‘risidagi ma'lumotlar ko‘rsatiladi, reyestr majburiy tartibda talabnomaga ilova qilinadi.