Фото: ISU CONSTANTA

Руминия соҳиллари яқинида, Қора денгизда 14 мингдан кўпроқ қўйни олиб кетаётган кема ағдарилиб кетди. Бу ҳақда “Би-Би-Си” телеканали хабар берди.  

Палау байроғи остида ҳаракатланган Queen Hind кемаси 24 ноябрда Мидия портидан чиққандан кўп ўтмай номаълум сабабга кўра ағдарилиб кетган. Оқибатда кемада қафасларда ушланган қўйлар сув остига кетган. Бир нечагина қўй сув сиртига чиқишга муваффақ бўлган ва уларни сувдан қутқарувчилар чиқариб олишган.

Кемада 22 денгизчи бўлиб, уларнинг барчаси суриялик бўлган. Уларга жароҳат етмаган, фақатгина бир денгизчи совқотиш аломатлари билан шифохонага етказилган.

Кема Саудия Арабистонининг Жидда шаҳрига йўналаётган бўлган.