Tojikiston-Qirg‘iziston chegarasida yuz bergan nizo oqibatida besh kishi jarohatlandi

Tojikistonda Qirg‘iziston bilan chegarada sodir bo‘lgan nizo oqibatida besh kishi jarohatlandi. Bu haqda Isfara shahri ma'muriyati vakili ma'lum qildi.

Avvalroq Qirg‘iziston chegara xizmati Tojikiston bilan chegarada 200 nafar kishi ishtirokida nizo yuz bergani, chegaradosh qishloqlar aholisi bir-birlarini toshbo‘ron qilganini xabar qilgandi. 

Bishkek nizo oqibatida olti kishi jarohatlanganligini ma'lum qildi. Bildirilishicha, voqeaga tojikistonliklar tomonidan Qirg‘iziston fuqarosining kaltaklanishi sabab bo‘lgan.

"Bugun ertalab Botken tumanining Ko‘ktosh qishlog‘i aholisi Somoniyon qishlog‘ida yashovchi besh fuqaroni kaltaklagan. Qishloq aholisi ko‘ktoshliklarni to‘xtatish uchun chiqqan, natijada ikki tomon bir-birini toshbo‘ron qilgan. Qirg‘iziston chegarachilari o‘q uzishganidan so‘ng bizning chegarachilarimiz javob qaytarishgan", - dedi Isfara shahri ma'muriyati vakili.

Uning so‘zlariga ko‘ra, hozirda vaziyat barqarorlashgan. Jabrlanganlar kasalxonaga yotqizilgan.