Qashqadaryoda ovoz beradigan saylovchilar diqqatiga!

Xalq demokratik partiyasining yangi Saylovoldi dasturida jamiyatdagi hal etilishi lozim bo‘lgan qator masalalarga e'tibor qaratilgan. Masalan, aholi turmush darajasini belgilashda, ijtimoiy siyosat va davlat ijtimoiy dasturlarini ishlab chiqib joriy etishda, shuningdek, mehnatga haq to‘lash, pensiyalar, stipendiyalar, nafaqalar va boshqa ijtimoiy to‘lovlarning eng kam darajasini belgilashda xalqaro hamjamiyatda umumqabul qilingan ko‘rsatkichlar, ya'ni, yashash minimumi va iste'mol savatchasi hamda ularni qo‘llash tartibini amaliyotga kiritish masalasi keng o‘rin olgan.

Oliy Majlis Qonunchilik palatasi deputatligiga Qashqadaryo viloyatidan ko‘rsatilgan nomzodlar partiyamizning saylovoldi siyosiy pozitsiyasi bo‘yicha o‘z fikrlarini bildirmoqda.

Jamila Turakulova, pedagog, Qarshi shahridagi 29-maktab direktori, 125-Qarshi saylov okrugidan nomzod:

– Qorni to‘q bolaning fikrlashi, bilimni qabul qilish darajasi qorni och bolanikiga nisbatan yuqori bo‘lishi ko‘p kuzatilgan. Maktablarda tashkil etiladigan nonushtaning ratsionga boy, to‘yimli, tabiiy mahsulotlardan tayyorlanishi o‘quvchilarning nafaqat puxta bilim olishi, balki sog‘lom va durkun o‘sishiga ham yordam beradi. Bugun unib o‘sayotgan bolalarning tomog‘idan tejab qolingan arzimas mablag‘ ertaga mamalkatga foyda keltirmaydi. Millat genofondining zaiflashuviga, pirovardida xalqning zarariga xizmat qiladi. Shundan kelib chiqib, biz maktabgacha ta'lim muassasalari tarbiyalanuvchilari va maktab o‘quvchilari uchun sog‘lom ovqatlanishni tashkil etish kerak, deb o‘ylaymiz.

Gulnora Aramova, filolog, Qarshi tumanidagi 10-ixtisoslashtirilgan umumta'lim maktabi direktori, 126-Beshkent saylov okrugidan nomzod:

– Xotin-qizlar uchun yaratilayotgan sharoitlar, ularga bo‘layotgan e'tibor va g‘amxo‘rlik haqida ko‘p gapiriladi. Lekin bu borada hali muammolar oz emas. Masalan, xotin-qizlarga ko‘maklashish masalasiga hamma joyda ham bir xilda e'tibor qaratilmayapti. Ayniqsa, og‘ir ijtimoiy vaziyatga tushib qolgan xotin-qizlarni turar-joy hamda ish bilan ta'minlash bo‘yicha jamoatchilik va deputatlik nazoratini yanada kuchaytirish kerak, deb o‘ylayman. Yana bir muhim masala. Afsuski, ayollar orasida mehnat qonunchiligidan boxabar bo‘lganlari juda kam. Shuning uchun bandlikka ko‘maklashish markazlaridami yoki boshqa joydami, albatta, xotin-qizlarga mehnat munosabatlari qonunchiligini o‘rgatishimiz shart.

Shomurod Sattarov, huquqshunos, O‘zbekiston Yoshlar ittifoqi kengashi raisi o‘rinbosari, 127-Qamashi saylov okrugidan nomzod:

– Albatta, qabul qilinayotgan me'yoriy-huquqiy hujjatlar jamiyatdagi u yoki bu ijtimoiy masalani hal etishga qaratilgani bilan ahamiyatli. Biroq ular amalda to‘g‘ri ishlayaptimi? Imtiyozli kreditlar va pul mablag‘lari o‘z egalari, ya'ni ijtimoiy himoyaga muhtoj aholi vakillariga yetib boryaptimi? Biz, ana shu savollarga javob topishimiz kerak, deb o‘ylayman. Yollanma ishchilar, vaqtinchalik bandligi ta'minlangan shaxslarning mehnat huquqlari himoyasi bilan bog‘liq muammolar ham yetarli. Ularga mehnat daftarchalari yuritish, faoliyati davomida xavfsizligini ta'minlash bo‘yicha muammolarga yechim topishimiz kerak, deb o‘ylayman.

Gayrat Ibadullayev, sanoat va fuqaro qurilishi, “Sho‘rtan gaz kimyo majmuasi” mas'uliyati cheklangan jamiyati Bosh direktorning kapital qurilish va ta'mirlash bo‘yicha o‘rinbosari vazifasini bajaruvchi, 128-Nishon saylov okrugidan nomzod:

– “Ishlab chiqarish ipotekasi”ni, ya'ni tijorat banklarining investitsiyaviy resurslari hisobiga tayyor korxonalar tashkil etish va kelgusida tadbirkorlik sub'yektlariga kredit yoki lizing bo‘yicha sotish mexanizimini amaliyotga kiritish. Shuningdek, import o‘rnini bosadigan ijtimoiy ahamiyatga molik tovar va xizmatlarni ishlab chiqarish bo‘yicha asosli biznes-loyihalarni amalga oshirish uchun imtiyozli kreditlarni joriy etish lozim. Bir narsani unutmaylik, ichki bozorni o‘zimizda ishlab chiqarilgan yuqori qo‘shimcha qiymatga ega tovarlar bilan to‘ldirish barqaror iqtisodiy rivojlanishning asosiy omilidir.

Salim Sayimov, Qashqadaryo viloyati madaniyat boshqarmasi boshlig‘i, 129-Koson saylov okrugidan nomzod:

– Aholi bilan uchrashuvlarda nogironligi bo‘lgan shaxslar va aholining ijtimoiy himoyaga muhtoj boshqa toifalariga ko‘rsatilayotgan tibbiy-ijtimoiy xizmatlardan, nogironlikni belgilashdagi muammolar, muhtoj shaxslarni protez-ortopedik buyumlar va reabilitatsiya texnik vositalar bilan ta'minlash masalalarida muammolar yig‘ilib qolgani bo‘yicha ko‘plab mulohazalar bildirilmoqda. Shundan kelib chiqib, aholining alohida toifalariga ajratiladigan dori vositalari, protez-ortopediya vositalari va boshqa tibbiy-ijtimoiy yordamni imtiyozli taqdim etish tizimini takomillashtirish, bu borada samarali jamoatchilik nazoratini o‘rnatish. Kerak, deb o‘ylaymiz.

Zebo Salimova, pedagog, Koson tumanidagi 38-maktab direktori, 130-Kasbi saylov okrugidan nomzod:

– Inson munosib hayot kechirishi, orzu-havaslarini ro‘yobga chiqarishi uchun mehnat qilishi hamda mehnatiga yarasha haq olishi zarur. Ishsizlik insonni tushkunlikka tushiradi, u o‘zini jamiyatga keraksizdek his qila boshlaydi. Shularni inobatga olib, biz ishga joylashishda qiyinchiliklarga duch kelayotgan ayollar, “Mehribonlik uylari” bitiruvchilari hamda ijtimoiy himoyaga muhtoj boshqa qatlamlar uchun ishga joylashish bo‘yicha huquqiy kafolatlarni oshirish hamda “Teng ish uchun - teng ish haqi” tamoyiliga qat'iy rioya etilishi tarafdorimiz.

Barno Alibekova, pedagog, Kitob tumanidagi 25-maktab direktori, 131-Kitob saylov okrugidan nomzod:

– Xotin-qizlar masalasi hamisha dolzarb va doimiy yangilanib borishni talab etadi. Bandlikka ko‘maklashish markazlariga juda katta mablag‘ ajratilgan. Joylarda ayollarni bozor talab qiladigan kasbga o‘rgatishga mo‘ljallangan o‘quv markazlari tashkil etish lozim. Buning uchun imkoniyat ham, mablag‘ ham yetarli, deb o‘ylayman. Ularni ish bilan ta'minlashning yana bir jihatiga alohida to‘xtalish o‘rinlidir. Ya'ni tegishli pedagogik ma'lumotga ega, lekin maktabgacha yoshdagi bola tarbiyasi bilan mashg‘ul bo‘lgani bois ishlamaydigan ayollarni maktabgacha ta'lim hududiy organlari tizimida oilaviy maktabgacha ta'lim tarbiyachisi sifatida uy mehnatini tashkil etish kerak, deb o‘ylaymiz.

Sahiddin Iboyev, tarixchi, Chiroqchi transport kasb-hunar kolleji direktori, 132-Chiroqchi saylov okrugidan nomzod:

– Sud-huquq tizimida olib borilayotgan keng ko‘lamli islohotlar huquqiy yechimini kutayotgan ko‘plab dolzarb masalalarni hal etish, qonunlar ijrosini izchil ta'minlash, eng muhimi, odamlarning mamlakatimizda olib borilayotgan odil­ona siyosatga ishonchini yanada oshiradi. Partiyamiz  fuqarolarning huquqlarini himoya qilish bo‘yicha sud mexanizmlarining maqbulligini ta'minlash, qonun ustuvorligini yanada mustahkamlash, qonun oldida barchaning tengligi – huquqlar, majburiyatlar va imkoniyatlar tengligiga qat'iy amal qilish ga alohida e'tibor qaratilganligini inobatga olsak, ushbu vazifalar biz uchun ham prinsipial ahamiyatga ega.

Dilorom Imomova, Qashqadaryo viloyati Shahrisabz tuman maktabgacha ta'lim bo‘limi mudiri, 133-Shaxrisabz saylov okrugidan nomzod:

– Bizning maqsadimiz, vazifamiz, kerak bo‘lsa, hayot tarzimiz xalq bilan muloqotga bog‘liq. Demak, ko‘proq xalq ichiga kirib borishimiz kerak. Har bir monitoring natijalariga ko‘ra, tegishli qarorlar qabul qilinishi zarur. Bunda, odamlar ijtimoiy muammolarini xolis va adolatli hal etishda partiya yordam berishini bilishi kerak. Bu holatda mazkur masalalar bo‘yicha “uchinchi tomonga” murojaat qilishga zaruriyat qolmaydi. O‘z navbatida, partiya mahalliy kengashlari huzuridagi jamoatchilik qabulxonalari faoliyati samaradorligini oshirish va partiya guruhlari bilan o‘zaro hamkorligini mustahkamlashni rejalashtirganmiz.

Toshburi Egamnazarov, muxandis, Amu-Qashqadaryo irrigatsiya tizimlari havza boshqarmasi boshlig‘ining birinchi o‘rinbosari, 134-Yakkabog‘ saylov okrugidan nomzod:

– Mehnat qilish huquqi — inson uchun eng hayo­tiy va ishonchli ijtimoiy himoya, orzu-istaklari, farzandlari kamoloti yo‘lidagi tengi yo‘q tayanch vositasidir. Olis qishloq hududlaridagi maktablar, qishloq vrachlik punktlari va boshqa ijtimoiy soha obektlariga malakali va tajribali mutaxassislarni jalb etish maqsadida partiya bunday xodimlarni moddiy va ma'naviy rag‘batlantirish mexanizmini qonunchilikda mustahkamlash bo‘yicha taklif tayyorlash hamda uni parlamentdagi fraksiyasi orqali qonunchilik tashabbusi sifatida ilgari surish yo‘nalishida dolzarb masalalarning yechimini taklif qilyapman.

Otabek Bozorov, neft va gaz geologiyasi, biznes boshqaruvi, “O‘zbekneftgaz” aksiyadorlik jamiyati geologik-geofizik ishlarni muvofiqlashtirish bo‘limi boshlig‘i, 135-G‘uzor saylov okrugidan nomzod:

– Mamlakatimizda mutasaddi tashkilotlarga eng ko‘p murojaat qilinadigan, qolaversa, aholi orasida eng ko‘p muhokama etiladigan sohalardan biri kommunal xizmatlar bilan bog‘liq. Uy-joy xo‘jaligining holati bugungi kunda davlatning eng dolzarb muammolaridan biriga aylandi.

Biz ushbu masalalarda tashabbuslar bilan chiqishni rejalashtirdik. Ya'ni, markazlashgan isitish va issiq suv ta'minotini, maishiy chiqindilarni olib ketish va utilizatsiya qilish xizmatlarini ko‘rsatuvchi korxonalarni tabiiy monopoliyasi bo‘yicha qonunchilik me'yorlarini ko‘rib chiqish kerak, deb o‘ylaymiz.

Qahramon Normuxammedov, matematik, Ta'lim sifatini nazorat qilish davlat inspeksiyasi Qashqadaryo viloyati bo‘limi boshlig‘i, 136-Dehqonobod saylov okrugidan nomzod:

– Yoshlarning mamlakatimizdagi ijti­moiy-siyosiy jarayonlarda faol ishtirok etishi dolzarb masaladir. Partiyaning fikricha, bugungi kunda yoshlarga oid davlat siyosati yoshlarning mamlakat siyosiy hayotidagi faol ishtirokini ta'minlashga xizmat qilishi lozim. Demak, salohiyatli yoshlarga siyosiy partiyalar tizimida ishlash va deputatlik faoliyatida o‘zini namoyon qilish imkoniyatini berish zarur. Yigit-qizlarimizning turmush tarzini, qiziqishlarini doimiy ravishda o‘rganishimiz, ularning faolligini oshirishga yordam beradigan amaliy tadbirlarni izchil yo‘lga qo‘yishimiz talab etiladi.

Nigora Qurbonova, biolog, Muborak tumanidagi 20-maktab direktori, 137-Muborak saylov okrugidan nomzod:

–  Mamlakatimizda ta'lim sohasida uzoqni ko‘zlab amalga oshirilayotgan islohotlar partiyamiz Saylovoldi dasturidan ham keng o‘rin olgan. Xususan, aholining ijtimoiy himoyasidan kelib chiqib,qishloq yoshlarini keyinchalik o‘z qishlog‘ida ishlash sharti bilan davlat grantlari asosida pedagogik, tibbiyot va boshqa ixtisoslikdagi oliy ta'lim muassasalariga o‘qishga imtiyozli qabul qilish, to‘lov-shartnoma asosida tahsil oladigan kam ta'minlangan oilalarning farzandlariga imtiyozli ta'lim kreditlarini ajratish kerak, deb hisoblaymiz.

Sharofiddin Nazarov, xalq xo‘jaligini rejalashtirish, O‘zbekiston Milliy universiteti professori, 138-Ko‘kdala saylov okrugidan nomzod:

– Partiyamiz ijtimoiy qo‘llab-quvvatlash tizimida boqimandalik kayfiyatini bartaraf etish tarafdori. Ushbu masaladan kelib chiqib, biz bir qator takliflar ishlab chiqdik. Masalan, deputatlik va jamoatchilik nazorati tarzida “mardikor bozorlari”ni o‘rganib chiqish va shu asnoda fuqarolarni vaqtincha bir martalik ish bilan ta'minlashga oid  huquqiy-me'yoriy hujjatlar nega ish bermayotganining sabablarini aniqlashni maqsad qilganmiz. Bandlik va ishsizlikka qarshi kurashish sohasida davlat siyosatini amalga oshirishga doir ilg‘or xorijiy tajribani o‘rganish kerak, deb o‘ylaymiz.

Hurmatli saylovchilar! Bizning hayotiy va xalqchil dasturlarimizni qo‘llab-quvvatlang. Nomzodlarimizga ovoz bering!

O‘zXDP Markaziy Kengashi
Axborot xizmati