Qirg‘iziston prezidentining TU-154 samolyoti 20 dekabrda texnik nosozlik sababli Sankt-Peterburgdan ucha olmadi. Bu haqda Qirg‘iziston ommaviy axborot vositalari Qirg‘iziston transport va yo‘llar vazirligi qoshidagi fuqarolik aviatsiyasi agentligiga asoslanib ma'lum qilgan.
Shu sababli Sankt-Peterburgda Yevrosiyo oliy iqtisodiy kengashi yig‘ilishida ishtirok etgan Sooronbay Jeenbekov Bishkekka oddiy reysda qaytishiga to‘g‘ri kelgan.
Avvalroq qirg‘izistonlik deputatlar prezident samolyotining o‘zgartirilishini bir necha bor taklif qilishgan. Jumladan, deputat Abtandil Kulbarakov 2018 yilda parlament yig‘ilishlaridan birida Jeenbekovning bunday eski samolyotda uchishi nomaqbulligini aytgan.
“Davlat rahbari 1993 yilda ishlab chiqarilgan TU-154’da uchadi. U 25 yil avval ishlab chiqarilgan. Men bu samolyotda ishchi safarlar vaqtida parvozlar amalga oshirilishini tushunishim mumkin, ammo rasmiy safarlar vaqtida bunga yo‘l qo‘yib bo‘lmaydi. Boz ustiga, bunday vaqtda prezidentga hukumat a'zolari, deputatlar va jurnalistlar hamrohlik qiladi”, deb aytgan deputat.
