Bosh prokuraturada sog‘liqni saqlash vazirligi tizimida korrupsiya holatlari hamda ularni keltirib chiqarayotgan shart-sharoitlarni muhokama qilishga bag‘ishlangan Korrupsiyaga qarshi kurashish bo‘yicha respublika idoralararo komissiyasining navbatdagi yig‘ilishi bo‘lib o‘tdi.
Kun.uz muxbirining xabar berishicha, tadbirda respublika bosh prokurori Nig‘matilla Yo‘ldoshev ma'ruza qildi.
«Sog‘liqni saqlash tizimidagi yana bir ayanchli holat – tibbiyot xodimlarining psixotrop moddalar noqonuniy savdosi bilan shug‘ullanishidir.
O‘tgan davrda 19 nafar xodim bunday ishga qo‘l urganligi uchun jinoiy javobgarlikka tortildi, ularning 12 nafarini hamshiralar, 7 nafarini shifokorlar tashkil etdi.
Afsuski, tizimda shaffoflik, adolat, tibbiy xizmat sifatini oshirish nuqtai nazaridan amaliy va ta'sirchan choralar deyarli ko‘zga tashlanmayapti.
E'tibor bering. 2018 yilda «Ijtimoiy fikr» jamoatchilik Markazi o‘tkazgan so‘rovda ishtirok etganlarning 34 foizi sog‘liqni saqlash tizimida korrupsiya keng tarqalgan degan fikrni bildirgan bo‘lsa, 2019 yilda bu salbiy ko‘rsatkich 43 foizni tashkil etgan.
Avvalo, har qanday tizim, har qanday sohaga xalq, keng jamoatchilik bahosidan xolis baho yo‘q, desak adashmagan bo‘lamiz», - dedi u.
