Tanzila Norboyeva IIVning yangi fond tuzish bo‘yicha taklifini rad etdi

Bugun, 30 dekabr kuni Oliy Majlis Senatida Odam savdosiga va majburiy mehnatga qarshi kurashish milliy komissiyasi majlis o‘tkazdi. Uni komissiya raisi – Senat rahbari Tanzila Norboyeva olib bordi.

Majlisda so‘zga chiqqan Ichki ishlar vazirining birinchi o‘rinbosari Aziz Toshpo‘latov xorijiy davlatlarda odam savdosi qurboni bo‘lgan va qiyin ahvolga tushib qolgan fuqarolarni vatanga qaytarib olib kelishdagi muammolar haqida gapirdi.

«Bunda asosiy muammolarimiz – yo‘l xarajatlari va jabrlanganlarga vaqtincha yashab turishlari uchun uy-joy va oziq-ovqatga sarflanadigan pul mablag‘larini qoplashga qaratilgan jamg‘arma yoki manba mavjud emasligi. Hattoki chet davlatlardagi konsullik xizmatlarimizda ham shunday muammolar yuzaga kelmoqda.

Shuning uchun odam savdosi qurboni bo‘lgan yoki qiyin ahvolga tushib qolgan fuqarolarga nafaqat yuqorida aytib o‘tilgan yordamlarni, balki tibbiy, ijtimoiy, yuridik hamda boshqa yordamlarning ko‘rsatilishini inobatga olgan holda xalqaro ekspertlar tomonidan berilgan tavsiyalar asosida odam savdosi jabrdiydalari uchun fond tashkil qilishimiz kerak», – degan Toshpo‘latovning so‘zlarini keltirdi Kun.uz muxbiri.

Vazir o‘rinbosari, shuningdek, odam savdosi jabrdiydalariga yordam berish bo‘yicha respublika reabilitatsiya markazida zaruriy yordam ko‘rsatilishi xalqaro standartlarga mos kelmasligini ham qayd etdi.

«Misol uchun, hozirgi kunda 1 nafar jabrlanuvchi uchun tibbiy dori-darmonlar (10 kun uchun) 49 ming so‘mni tashkil qilmoqda hamda kunlik ovqatlanish uchun 11 ming 900 so‘m pul ajratiladi. Albatta, bu bilan hozirgi kunda joylashtirish hamda yordam berish imkoniyati yo‘q. Buni ham qo‘shimcha mablag‘ bilan ta'minlash masalasini ko‘rib chiqish maqsadga muvofiq bo‘lar edi», – dedi Aziz Toshpo‘latov.

Bunga javoban Senat raisi Tanzila Norboyeva barcha tuzilmalar, jumladan, Xotin-qizlar qo‘mitasi, Fuqarolarning o‘zini o‘zi boshqarish organlari faoliyatini muvofiqlashtirish bo‘yicha Respublika kengashi va Yoshlar ittifoqida fondlar borligini aytib o‘tdi.

«Ana shu mavjud fondlardan samarali foydalanish kerak. Hammalarining faoliyatida ham ana shu yo‘nalish [odam savdosi jabrdiydalariga yordam ko‘rsatish yo‘nalishi] bor. Hamma nodavlat tashkilotlariga kerakligidan ortiq pullarni davlat rahbari berdilar», – dedi Norboyeva.

Komissiya raisi pullardan maqsadli hamda samarali foydalanish uchun mutasaddi vazirliklar vakillaridan iborat ishchi guruh tuzish va Moliya vazirligiga takliflar kiritish bo‘yicha topshiriq berdi.