Turkiyadagi avikompaniya xodimi Karlos Gonga yordam bermasa oilasiga zarar yetkazish bilan tahdid qilishganini aytdi

Turkiyadagi aviatashuv xizmati ko‘rsatuvchi MNG Jet kompaniyasi xodimi agarda u keyinroq Nissan sobiq rahbari Karlos Gon ekanligi ma'lum bo‘lgan kishini mamlakatdan olib chiqib ketishga yordam ko‘rsatmasa, oilasiga zarar yetkazish bilan tahdid qilishganini aytdi. Bu haqda IHA agentligi xabar berdi.

Agentlikning ma'lumot berishicha, MNG Jet amaliyot bo‘limining hibsga olingan boshlig‘i O‘kan Ko‘semen sobiq tanishi unga tahdid qilganini aytgan.

"Bayrutlik sobiq tanishim menga qo‘ng‘iroq qilib xalqaro ahamiyatga molik ish borligini, agarda yordam bermasam, xotinim va bolamga zarar yetishini aytdi. Men qo‘rqib ketdim. Men aeroportga samolyotda keltirilgan kishini boshqa samolyotga olib o‘tdim. Uning kimligini bilmadim", - degan u.

Avvalroq MNG Jet Gon Yaponiyani tark etganligi taxmin qilingan samolyot yo‘lovchilari ro‘yxatida uning ismi bo‘lmaganligini bildirgandi. Kompaniyaning qayd etishicha, uning xodimlaridan biri ayrim ma'lumotlarni soxtalashtirganini tan olgan.

Avvalroq Turkiyada Karlos Gonning Yaponiyadan Livanga Istanbul orqali qochishi bo‘yicha qo‘zg‘atilgan tergov ishi doirasida yetti kishi hibsga olingani xabar qilingandi.

31 dekabr kuni Fransiya, Braziliya va Livan fuqaroligiga ega bo‘lgan Gon Livanga kelgani ma'lum bo‘lgandi.

OAV ma'lumotlariga ko‘ra, Karlos Gon Yaponiyani 30 dekabrda tark etishga muvaffaq bo‘lgan. Uning Tokiodagi uyiga yollanma shaxslar guruhi yangi yil bilan tabriklash bahonasida musiqachilar ko‘rinishida kirib, uni musiqa asbobi g‘ilofida olib chiqib ketishgan. Yaponiya xavfsizlik xodimlari shubhali hech narsa sezishmagan.  

So‘ngra Gon kichikroq aeroportga olib borilib, u yerdan Turkiyaga, so‘ngra xususiy samolyotda Livanga uchib ketgan.  

Yaponiyada moliyaviy firibgarliklarda ayblangan Gon 2018 yil kuzida hibsga olinib, 2019 yil martida garov puli evaziga ozodlikka chiqarilgan. Unga Yaponiyani tark etish va rafiqasi bilan muloqot qilish taqiqlangan edi. U Yaponiyada 80 mln dollarlik daromadni yashirishda ayblanmoqda.