Amudaryodagi xonadondan uch kishining jasadi topildi

Qoraqalpog‘iston Respublikasi Amudaryo tumanida joylashgan xonadondan uch kishining jasadi topildi. Bu haqda Bosh prokuratura jamoatchilik bilan aloqalar va huquqiy axborot bo‘limi boshlig‘i Hayot Shamsutdinov xabar berdi.

Qayd etilishicha, 2020 yil 8 yanvar kuni Amudaryo tumani Qipchoq ovulida yashovchi, 1993 yilda tug‘ilgan S.D.ga tegishli xonadonning yotoqxonasidan uning turmush o‘rtog‘i F.Sh. yuzining jag‘ va bo‘yin sohasida tan jarohatlari bo‘lgan holda va voyaga yetmagan, 2017 yilda tug‘ilgan qizi A.S.ning bo‘g‘ishga xos qotillik alomatlari bilan jasadlari topilgan. 

Omborxonadan esa xonadon egasi S.D.ning o‘z joniga qasd qilib, o‘zini-o‘zi osib, vafot etgan holdagi jasadi topilgan.

Mazkur holat yuzasidan shu kuni tuman prokuraturasi tomonidan Jinoyat kodeksining 97-moddasi 2-qismi “a” bandi bilan jinoyat ishi qo‘zg‘atilib, tergov harakatlari olib borilmoqda.