O‘zbekistonda avtomobil yo‘llari bo‘yicha yangi jamg‘armalar tuziladi

Qayd etilishicha, prezidentning 2019 yil 9 dekabrdagi PF-5890-sonli “O‘zbekiston Respublikasi Yo‘l xo‘jaligi tizimini chuqur isloh qilish chora-tadbirlari to‘g‘risida” farmoniga muvofiq:

a) Qoraqalpog‘iston Respublikasi Jo‘qorg‘i Kengesi, viloyatlar va Toshkent shahar xalq deputatlari Kengashlari:

avtomobilga yonilg‘i va gaz quyish stansiyalari tomonidan avtomobil benzini, dizel yoqilg‘isi, suyultirilgan va siqilgan gazni oxirgi iste'molchilarga realizatsiya qilishda yoqilg‘i birligi uchun 25 so‘mdan ortiq bo‘lmagan miqdorda mintaqaviy yo‘llarni rivojlantirishga maxsus yig‘imni;

yo‘l harakatini tartibga solish, mavjud yo‘l-transport infratuzilmasidan oqilona foydalanish, shuningdek, yo‘l harakati ishtirokchilari mas'uliyatini oshirish maqsadida avtomobil yo‘llari va ko‘chalar bo‘ylab avtomobil saqlash joylaridan foydalanganlik uchun to‘lovlarni belgilashga haqli;

b) tumanlar (shaharlar) xalq deputatlari Kengashlari transport vositasi dvigatelining quvvatidan kelib chiqib, avtotransport vositasiga egalik qilish uchun yillik yig‘im joriy etishga haqli.

Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari Moliya vazirligi bilan kelishilgan holda 2020 yil 1 martga qadar va 2021 yildan boshlab Davlat budjetini tayyorlash va tasdiqlash bilan bog‘liq muddatlarda muayyan ma'muriy-hududiy aholisi daromadlari darajasini hisobga olgan holda maxsus yig‘im miqdorlarini keng jamoatchilik muhokamasi asosida Qoraqalpog‘iston Respublikasi Jo‘qorg‘i Kengesi, viloyatlar va Toshkent shahar xalq deputatlari Kengashlariga ko‘rib chiqish va tasdiqlash uchun kiritadi.

Belgilab qo‘yilishicha, hududiy maqsadli jamg‘armalarga maxsus yig‘im va avtomobil saqlash joylaridan foydalanganlik uchun to‘lovlardan tushadigan mablag‘lar doirasida Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari tomonidan mintaqaviy yo‘llarni qurilish-ta'mirlash ishlari bo‘yicha qo‘shimcha manzilli dasturlar shakllantiriladi va belgilangan tartibda sarflanadi.

Tuman (shahar) hokimliklari Moliya vazirligi bilan kelishilgan holda har yili 1 martga qadar muayyan ma'muriy-hududiy aholisi daromadlari darajasini hisobga olgan holda transport vositasi dvigatelining quvvatidan kelib chiqib, avtotransport vositasiga egalik qilish uchun yillik yig‘im miqdorlarini keng jamoatchilik muhokamasi asosida tuman (shahar) xalq deputatlari Kengashlariga kiritsin va avtotransport vositasiga egalik qilish uchun yillik yig‘imlari tuman (shahar) xalq deputatlari kengashlari tomonidan ma'qullangandan so‘ng tasdiqlaydi.

Belgilab qo‘yilishicha, avtotransport vositasiga egalik qilish uchun yillik yig‘imlar bo‘yicha mablag‘lar tuman (shahar) mahalliy budjetlariga yo‘naltiriladi va ushbu mablag‘lar tuman (shahar) hokimliklari tomonidan mintaqaviy yo‘llarni ta'mirlash ishlariga sarflanadi.

Shunday tartib o‘rnatiladiki, unga muvofiq:

Transport vazirligi huzuridagi Avtomobil yo‘llari qo‘mitasi umumiy foydalanishdagi avtomobil yo‘llarini loyihalashtirish, qurish, rekonstruksiya qilish va to‘la ta'mirlash bo‘yicha manzilli dasturlarni, loyiha va pudrat tashkilotlari, bajarilgan ishlar hajmi hamda foydalanishga topshirilgan obektlar to‘g‘risidagi axborotlarni;

Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari Mintaqaviy yo‘llarni loyihalashtirish, qurish, rekonstruksiya qilish va ta'mirlash bo‘yicha manzilli dasturlarni, loyiha va pudrat tashkilotlari, bajarilgan ishlar hajmi hamda foydalanishga topshirilgan obektlar to‘g‘risidagi axborotlarni;

Moliya vazirligi maqsadli jamg‘armalar tushumlari va xarajatlari to‘g‘risidagi ma'lumotlarni muntazam ravishda, keng jamoatchilik orasida muhokama etadi va ommaviy axborot vositalarida, shu jumladan, mos ravishda vazirlik va idoralar hamda Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklarining rasmiy veb-saytlarida e'lon qilib boradi.

«Avtomobil yo‘llari ko‘priklarini, yo‘l o‘tkazgichlar va boshqa sun'iy inshootlarni qurish hamda rekonstruksiya qilish direksiyasi» unitar korxonasi va «Toshkent shahar mintaqaviy yo‘llarga buyurtmachi xizmati» DUK tomonidan 2020 yil 1 yanvarga qadar amalga oshirilayotgan qurish-ta'mirlash ishlari bo‘yicha, obektlarni foydalanishga topshirilgunga qadar, buyurtmachi vazifasi saqlanib qolinadi va qurish-ta'mirlash ishlarini oxirigacha yetkazish vazifasi yuklatiladi.

Moliya vazirligi Davlat soliq qo‘mitasi bilan birgalikda maxsus yig‘imlardan tushadigan mablag‘lar hisobini yuritish va to‘lash tartibi to‘g‘risidagi Nizomni tasdiqlaydi.

Ichki ishlar vazirligi:

transport vositalarini texnik ko‘rikdan o‘tkazish uchun yig‘imning bazaviy stavkasi miqdorlari, shuningdek, transport vositasi dvigateli quvvatidan kelib chiqqan holda toifalanadigan qo‘shimcha koeffitsiyentlar Qoraqalpog‘iston Respublikasi Vazirlar Kengashi, viloyatlar va Toshkent shahar hokimlari tomonidan belgilanishini inobatga olib amaldagi qonunchilikka o‘zgartirish va qo‘shimchalar kiritish yuzasidan Vazirlar Mahkamasiga taklif kiritadi;

tegishli vazirlik va idoralar bilan birgalikda avtotransport vositasiga egalik qilish uchun yillik yig‘imdan tushadigan mablag‘larni hisobini yuritish va to‘lash tartibi to‘g‘risidagi Nizomni tasdiqlaydi.