O‘zbekiston Rossiyadan mehnat muhojirlariga nisbatan amnistiya so‘radi

O‘zbekiston hukumati Rossiyadan mehnat muhojirlariga nisbatan amnistiya so‘radi. Bu haqda «Kommersant'» O‘zbekiston Tashqi ishlar vazirligiga yaqin manbaga tayanib xabar berdi.

«Bir necha yuz ming O‘zbekiston fuqarolari Rossiyaga kira olmayapti, chunki ular avval migratsiya qonunchiligini buzgan. Rossiyaga keyinchalik qayta kirishga yo‘l qo‘yilmaydi deb, hududni tark etishga qo‘rqib turgan xuddi shuncha qonunbuzar bor», - deya ta'kidlaydi nashr.

Moskva Toshkentni possovet hududidagi integratsion jarayonlarga, birinchi navbatda, Yevrosiyo iqtisodiy ittifoqiga (YeOII) jalb etishdan manfaatdor. O‘zbekiston Armaniston, Belarus, Qozog‘iston, Qirg‘iziston va Rossiyani o‘z ichiga olgan tashkilotga a'zo bo‘lishi mumkinligi o‘tgan yili ma'lum bo‘ldi. Toshkent bu borada hali to‘liq qaror qabul qilmadi va hozirda barcha ijobiy hamda salbiy tomonlarini hisobga olmoqda.

Rossiya tashqi ishlar vaziri Sergey Lavrovning tashrifi arafasida, O‘zbekiston Respublikasi prezidenti Administratsiyasi qoshidagi Iqtisodiy tadqiqotlar va islohotlar markazi ekspertlari mamlakatning YeOIIga a'zo bo‘lishining afzalliklari va xavf-xatarlari to‘g‘risida birinchi hisobotni taqdim etdilar. Markaz xabariga ko‘ra, iqtisodiy maqsadga muvofiqlik nuqtai nazaridan, YeOIIda ishtirok etish O‘zbekiston biznesi uchun foydalidir. «Ittifoqqa kirgan taqdirda, mahalliy ishlab chiqaruvchilar bir qator mamlakatlar bozorlariga kirish bo‘yicha teng huquqqa ega bo‘lishadi, mehnat muhojirlari uchun sharoit yaxshilanadi, Rossiyaning investitsiya resurslari va texnologiyalaridan foydalanish imkoni paydo bo‘ladi», - deya hisoblaydi ekspertlar.

Shu bilan birga, «Kommersant'» manbalariga ko‘ra, O‘zbekiston ittifoq bo‘yicha bo‘lajak sheriklarga o‘zining qator tarmoqlari uchun imtiyozli o‘tish davrlariga (ba'zi hollarda o‘n yilgacha) ega bo‘lishni xohlayotganini oldindan bildirib qo‘ydi.