Тиббиёт ходимлари коронавируснинг тарқалиши билан боғлиқ вазият фақатгина Хубэй провинциясида ёмонлашганини қайд этди
Хитой Соғлиқни сақлаш миллий комиссияси расмий вакили Лянь Ванняннинг Ухандаги матбуот анжуманида маълум қилишича, коронавирусга қарши курашда «ҳал қилувчи палла» етиб келди. Бу ҳақда Al Jazeera хабар бермоқда.
Унинг сўзларига кўра, Хитойнинг барча провинцияларида (Хубэй бундан мустасно) коронавирус билан касалланишнинг тасдиқланган ҳолатлари сони ўн кундан буён доимий равишда пасайиб бораётгани яхши белгидир. Бироқ, Хубэй провинциясининг алоҳида туманлари бундан мустасно бўлиб, у ерда касалланган сони тез суръатларда ўсишда давом этмоқда.
Ўз навбатида, Хубэй провинциясининг соғлиқни сақлаш бўйича комиссияси раҳбари этиб тайинланган Ван Хэшен яқин кунларда Ухан шаҳрида янги дала госпиталлари пайдо бўлиши, у ерга ҳам касалланганлар, ҳам коронавирусни юқтириб олганликда гумон қилинганлар жойлаштирилиши ҳақида маълум қилди. Унинг сўзларига кўра, сўнгги вақт ичида қурилган дала шифохоналарида 6 900та жой мавжуд.
ХХР соғлиқни сақлаш комиссияси маълумотларига кўра, фақатгина сўнгги сутканинг ўзида Хубэй провинциясида коронавирус билан касалланишнинг 2 420та янги ҳолати қайд этилди. Улардан 1 923таси минтақа пойтахти Уханга тўғри келди. Хитойнинг материк қисмидаги бошқа барча минтақаларда 221та янги ҳолат рўйхатга олинди, икки киши вафот этди (ҳар иккиси Хубэйдан шимолда жойлашган Хэнань провинциясида).
Умуман олганда, январь ойининг бошидан бери янги коронавирус туфайли 1526 киши ҳаётдан кўз юмди.
Аввалроқ, Ухан аҳолисига ўз туманларидан чиқиш чеклангани хабар қилинганди.
