Amerika harbiylari kosmik fazoni nazorat qilish uchun moʻljallangan qurollarni yer atrofidagi orbitaga olib chiqishdi. Bu haqda AQSH Harbiy-havo kuchlari vaziri Troy Meynk maʼlum qildi, deb xabar berdi Air & Space Forces.
«Biz qayerda paydo boʻlishidan qatʼi nazar, oʻzgaruvchan tahdidlarga tayyorlikni taʼminlashda davom etamiz. Shuning uchun AQSH endi koinotni nazorat qilish uchun orbitada joylashtirilgan, qurolli kuchlarimizni dushman harakatlaridan himoya qila oladigan qurollarga ega», - dedi Meynk AQSH havo va kosmik kuchlari assotsiatsiyasi konferensiyasida.
Nashrning taʼkidlashicha, bu Amerika rasmiy vakili AQSH bevosita orbitada joylashtirilgan qurolga ega ekanini ochiqchasiga tasdiqlagan birinchi holatdir. Shu bilan birga, vazir aynan qaysi qurol haqida gap ketayotganini oshkor qilishdan bosh tortdi.
AQSH avvalroq Rossiyani koinotda boshqa sunʼiy yoʻldoshlarga tahdid solishi mumkin boʻlgan tizimlarni joylashtirganlikda bir necha bor ayblagan. 2024-yilda Vashington Rossiya boshqa kosmik apparatlarga hujum qilishi mumkin boʻlgan sunʼiy yoʻldoshni orbitaga chiqarganini maʼlum qildi. Shunda Amerika hukumati Rossiya koinotga yadroviy zaryadli sunʼiy yoʻldosh chiqarishi mumkinligi haqida ogohlantirgan edi. Moskva bu bayonotlarni «hiyla» deb atagan. Shu bilan birga, Rossiya BMT Xavfsizlik Kengashida koinotga yadro qurolini joylashtirishga yoʻl qoʻymaslik toʻgʻrisidagi rezolyutsiyani bloklagan edi.
