Yig‘ilish avvalida Turkiya Respublikasi Prezidenti Rajab Toyyib Erdog‘an O‘zbekiston rahbarini tashrifi bilan qutlab, ikki mamlakat parlamentlari, davlat idoralari va ishbilarmon doiralari o‘rtasidagi aloqalar mustahkamlanib borayotganidan mamnunligini bildirdi.
Erdo‘g‘an, shuningdek, O‘zbekiston bilan qo‘shma loyihalarni har tomonlama qo‘llab-quvvatlashini ta'kidladi.
O‘zbekiston Respublikasi Prezidenti Shavkat Mirziyoyev delegatsiyaga ko‘rsatilayotgan mehmondo‘stlik va cheksiz hurmat uchun Turkiya rahbari va xalqiga tashakkur izhor etdi.
«Bu uchrashuv – strategik sherikligimiz yuksak bosqichga ko‘tarilganining yaqqol ifodasidir. Mamlakatlarimiz o‘rtasida o‘zaro tovar ayirboshlash hajmini yaqin yillarda besh milliard dollarga yetkazishga qaratilgan ustuvor vazifalarni bajarishda ham ushbu kengash, albatta, muhim zamin bo‘ladi.
Biz bugungi yig‘ilish natijalarini mustahkamlab, kelgusi yili bo‘lib o‘tadigan uchrashuvning kun tartibi va hamkorligimizning asosiy yo‘nalishlari haqida hozirdan o‘ylashimiz maqsadga muvofiqdir», dedi Shavkat Mirziyoyev.
Ikki davlat rahbarlarining qo‘llab-quvvatlashi va yaratilayotgan sharoitlar natijasida hamkorlik ko‘lamini yanada kengaytirish mumkinligi ta'kidlandi.
Yig‘ilishda O‘zbekiston va Turkiya savdo vazirlari so‘zga chiqib, ikki tomonlama hamkorlik rivoji to‘g‘risida batafsil axborot berdi.
Muzokaralarda mamlakatlarimiz hamkorligiga oid barcha masalalar va ularning yechimlari, istiqboldagi asosiy vazifalar hamda qo‘shma loyihalar kelishib olindi.
Shavkat Mirziyoyev Strategik hamkorlik kengashining navbatdagi yig‘ilishini o‘tkazish uchun Rajab Toyyib Erdo‘g‘anni O‘zbekistonga taklif qildi.
Kengashning birinchi yig‘ilishi yakunlari bo‘yicha qo‘shma bayonot va ikki tomonlama hujjatlar imzolandi. Shuningdek, uchrashuvlar yakuni bo‘yicha jurnalistlar uchun brifing o‘tkazildi.
