Tibbiyot sohasida imtiyozli orderlar tarqatish tizimi tartibga solinadi

Qonunchilik palatasi Fuqarolarning sog‘lig‘ini saqlash masalalari qo‘mitasi tomonidan “Aholiga ixtisoslashtirilgan tibbiy xizmat ko‘rsatish: mavjud muammolar va ularning huquqiy yechimlari” mavzusida yig‘ilish o‘tkazildi.

Parlament saytida xabar qilinishicha, tadbirdan ko‘zlangan asosiy maqsad bugungi kunda aholiga ixtisoslashtirilgan tibbiy xizmat ko‘rsatish sifatini yaxshilash borasida uchrayotgan muammolarni bartaraf qilishdan iboratdir. 

Qayd etilishicha, tibbiyot muassasalari, xususan, 16 ta respublika ilmiy-amaliy tibbiyot markaziga yo‘naltirilayotgan imtiyozli toifadagi bemorlarga beriladigan bepul yo‘llanma (order)lar ajratilishida shaffoflikni ta'minlash, uzoq muddatli navbat kutishlarga barham berish, odamlarning ovoragarchiliklariga chek qo‘yish va bu borada kuchli jamoatchilik nazoratini o‘rnatish masalalari deputatlar diqqat markazida bo‘ldi.

Yig‘ilishda qayd etilganidek, bundan buyon tibbiy-tanlov komissiyasi tarkibiga parlament quyi palatasi yoki mahalliy kengashlar deputatlari va jamoatchilik vakillari ham kiritiladi.

Davlat budjeti mablag‘lari hisobiga tibbiy yordam ko‘rsatish to‘g‘risidagi nizomga ko‘ra, yo‘llanma (order) olish uchun bemor yashash joyi bo‘yicha qishloq vrachlik punktlariga, qishloq va shahar oilaviy poliklinikalariga murojaat qiladi. Ular tomonidan tibbiy yordam olishning darajasiga muvofiq tibbiyot birlashmalarining tegishli markaziy ko‘p tarmoqli poliklinikalariga yo‘llanma beriladi.

Imtiyozli toifaga kiradigan bemorlarga bepul tibbiy yordam ko‘rsatish uchun tibbiy-tanlov komissiyasining xulosasi asosida beriladigan order rasmiylashtiriladi.

Ta'kidlanganidek, o‘z sog‘lig‘iga beparvo bo‘lmagan fuqarolar quyi bosqichlarda tibbiy ko‘riklardan o‘tib, to‘g‘ridan-to‘g‘ri (ordersiz) ixtisoslashtirilgan muassasalarga murojaat qilgan taqdirda, markaz tartibli mijozlarni rag‘batlantirish chorlarini ko‘rishi maqsadga muvofiq. Ya'ni, bemorning ahvoliga qarab, uning navbatini tezlashtirilishi yoki to‘lovni amalga oshirishida imtiyozlar joriy etish tartibini o‘ylab ko‘rishning vaqti ham keldi.

Yig‘ilishda Sog‘liqni saqlash vazirligining mazkur masalalar bo‘yicha mutaxassislari bugungi holat va oldinda turgan vazifalar yuzasidan batafsil ma'lumot berdilar. 

Muhimi, deyildi tadbirda, order har kimga ham emas, balki, aynan ehtiyojmand fuqaroga ajratilishiga erishish, bunda davolanish uchun order xarajatlari davlat budjeti hisobidan qoplanishi va uning ijrosini jamoatchilik asosida nazoratga olishga erishish. Order ajratishni bir idora tasarrufidan chiqarish, barcha fuqarolar ochiqlik tamoyili asosida yo‘llanmalarning ajratilishini kuzatib borishlarini ta'minlash tizimini yo‘lga qo‘yish taklif etildi. Bu jarayonga xalq vakillari ham jalb etiladi, ular muammoga befarq bo‘lmaydi.