Toshkent transport universiteti tashkil etiladi

Prezidentning “Transport sohasida kadrlar tayyorlash tizimini tubdan takomillashtirish chora-tadbirlari to‘g‘risida”gi qarori loyihasi muhokama uchun joylashtirildi.

Transport vazirligi, Oliy va o‘rta maxsus ta’lim vazirligi hamda “O‘zbekiston temir yo‘llari” AJning Toshkent temir yo‘l muhandislari instituti, Toshkent avtomobil yo‘llarini loyihalash, qurish va ekspluatatsiyasi instituti va Toshkent davlat texnika universitetining aviakosmik texnologiyalari fakulteti negizida Toshkent transport universitetini tashkil etish to‘g‘risidagi taklifiga rozilik berilishi mumkin.

Belgilab qo‘yilishicha:

Universitet transport sohasi uchun oliy ma’lumotli kadrlarni tayyorlash, qayta tayyorlash va malakasini oshirish bo‘yicha tayanch oliy ta’lim muassasasi hisoblanadi;

Universitet tasarrufi bo‘yicha Transport vazirligiga idoraviy bo‘ysunadi;

Universitet Toshkent temir yo‘l muhandislari instituti, Toshkent avtomobil yo‘llarini loyihalash, qurish va ekspluatatsiyasi instituti hamda Toshkent davlat texnika universitetining aviakosmik texnologiyalari fakultetining barcha huquqlari va majburiyatlari bo‘yicha huquqiy vorisi hisoblanadi;

Universitet Toshkent shahar, Odilxo‘jayev ko‘chasi, 1-uyda joylashtiriladi.

Universitetning asosiy vazifalari va faoliyati yo‘nalishlari etib quyidagilar belgilanadi:

transport sohasining ehtiyojlaridan kelib chiqib, xalqaro standartlar va ilg‘or ta’lim texnologiyalarini qo‘llash asosida oliy ma’lumotli raqobatbardosh mutaxassislar va ilmiy – pedagogik kadrlarni tayyorlash, qayta tayyorlash va ularning malakasini oshirish;

transport sohasiga raqamli texnologiyalarni joriy etish, sohaning ilmiy muammolari bo‘yicha fundamental, amaliy va innovatsion izlanishlar olib borish va natijalarini amaliyotga joriy etish;

o‘quv rejasi va fan dasturlarida sohaning zamonaviy ishlab chiqarish jarayonlari, yuqori unumli va ilg‘or texnologiyalar bo‘yicha bilimlarni aks ettirish, ta’lim berish jarayonida nazariya va amaliyot birligini ta’minlash orqali universitet bitiruvchilarining mehnat bozoridagi raqobatbardoshligini oshirish;

fan, ta’lim va ishlab chiqarish integratsiyasini ta’minlash;

qo‘shma ta’lim dasturlari, ilmiy loyihalarni amalga oshirish, zamonaviy ta’lim dasturlarini tatbiq etish, professor-o‘qituvchilar, ilmiy va ilmiy-pedagog kadrlarning xorijda malakasini oshirish va stajirovkalarini tashkil etish hamda bitiruvchilarning magistratura, aspirantura va doktorantura dasturlari bo‘yicha tahsil olishlarini ta’minlash maqsadida xorijiy yetakchi oliy ta’lim va ilmiy muassasalar bilan hamkorlik aloqalarini rivojlantirish;

o‘quv-laboratoriya bazasini modernizatsiyalash, transport sohasi uchun kadrlar tayyorlashning uzluksiz tizimini yaratish, tasarrufidagi akademik litsey hamda professional ta’lim muassasalari ta’lim dasturlarining uzluksizligi va uzviyligini ta’minlash;

transport sohasidagi tashkilotlar bilan birgalikda bakalavriat va magistratura talabalarining malakaviy va ishlab chiqarish amaliyotlarini tegishli soha korxonalarida tashkil etish, bitiruvchilarni ish bilan ta’minlash bo‘yicha maqsadli hamkorlikni yo‘lga qo‘yish;

Universitet bitiruvchilarini o‘z mutaxassisligi bo‘yicha ishga yo‘naltirish, ularning kasbiy faoliyati monitoringini tizimli tashkil etish.

Universitetga quyidagi huquqlar beriladi:

Oliy va o‘rta maxsus ta’lim vazirligi bilan kelishilgan holda mustaqil ravishda o‘quv rejalari va dasturlarni, bitiruvchilarga qo‘yiladigan malaka talablarini o‘quv jarayonining transport sohasini rivojlantirishning ustuvor yo‘nalishlari bilan uzluksiz aloqasi ta’minlanishini hisobga olgan holda mustaqil ishlab chiqish va tasdiqlash;

kredit-modul tizimini o‘quv jarayoniga joriy etish bo‘yicha professor-o‘qituvchilar o‘quv yuklamasini mustaqil me’yorlashtirish, shuningdek pedagog xodimlar tomonidan o‘quv-uslubiy, ilmiy-tadqiqot ishlari, «ustoz-shogird» tizimi bo‘yicha ishlarning bajarilishini rag‘batlantirib borish;

shartnoma asosida Universitet faoliyati yo‘nalishlari bo‘yicha maslahat va ekspert-analitik xizmatlarini ko‘rsatish, shuningdek Vasiylik kengashi bilan kelishilgan holda taqdim etilayotgan xizmatlarni samarali amalga oshirish maqsadida ilmiy-tadqiqotchilik va innovatsion xizmatlar tuzilmalarini shakllantirish;

bakalavriat, magistratura va oliy ta’limdan keyingi ta’lim yo‘nalishlari bo‘yicha yetakchi xorijiy oliy ta’lim muassasalari bilan hamkorlikdagi qo‘shma ta’lim dasturlari asosida kadrlar tayyorlash;

kadrlar iste’molchilarining talablarini inobatga olgan holda, o‘quv rejalardagi nazariy ta’lim ulushini qisqartirish hisobiga barcha turdagi amaliy mashg‘ulotlar hajmini oshirish, haftada bir kunlik amaliyot tajribasini qo‘llash.

Transport vazirining barcha o‘rinbosarlari va boshqarma boshliqlari, Avtomobil yo‘llari qo‘mitasi raisi va uning o‘rinbosarlari, transport tizimidagi barcha aksiyadorlik jamiyatlari rahbarlari va rahbar o‘rinbosarlari doimiy ravishda bir o‘quv yilida kamida ikki marotaba Universitet professor-o‘qituvchilari va talabalari uchun o‘z yo‘nalishlari bo‘yicha ma’ruza o‘qishlari tartibi joriy etiladi.

Toshkent transport universitetining Vasiylik kengashi tarkibi tasdiqlanadi.

Vasiylik kengashining asosiy ustuvor vazifalari etib quyidagilar belgilanadi:

Universitetdagi ta’lim sifatini ta’minlash jarayonlari ustidan jamoatchilik nazoratini tashkil etish, Universitetni rivojlantirish va samarali faoliyatini ta’minlash;

bitiruvchilarning kasbiy tayyorgarligini oshirish bo‘yicha kadrlar buyurtmachilari bilan samarali hamkorlikni yo‘lga qo‘yish;

ta’lim va ilm sohasida xalqaro hamkorlikni rivojlantirish va amalga oshirishda ko‘maklashish;

oliy ta’limni rivojlantirishga qaratilgan yangi shakl va dasturlarni qo‘llab-quvvatlash va ilmiy-tadqiqot ishlari natijalarini amaliyotga joriy etishni rivojlantirish;

Universitet rektorining har o‘quv yili yakuni bo‘yicha hisobotini muhokama qilish va boshqalar.

Toshkent temir yo‘l muhandislari instituti hamda Toshkent avtomobil yo‘llarini loyihalash, qurish va ekspluatatsiyasi institutlarining akademik litseylari negizida Toshkent transport universiteti akademik litseyi tashkil etiladi.

Akademik litsey Toshkent shahar, Chilonzor tumani, Guliston mavzesi, 21-a uy manziliga joylashtiriladi.

Akademik litseyni moliyalashtirish Davlat budjeti mablag‘lari hisobidan amalga oshirilishi belgilab qo‘yiladi.

Kelgusida mehnat faoliyati xususiyatlari va o‘quv amaliyoti transport vositasi harakati hamda insonlar hayoti xavfsizligini ta’minlash bilan bog‘liq ta’lim yo‘nalishlari bo‘yicha Universitetga o‘qishga hujjat topshirishlaridan oldin abituriyent va talabalarni temir yo‘l transporti bo‘yicha “O‘zbekiston temir yo‘llari” aksiyadorlik jamiyatining hududlardagi temir yo‘l poliklinikalarida tashkil etilgan ixtisoslashtirilgan tibbiyot komissiyasida, shuningdek havodagi harakatni boshqarish yo‘nalishi bo‘yicha “Uzbekistan Airports” aksiyadorlik jamiyati tibbiy sanitariya bo‘limining vrachlik-uchuvchilik ekspert komissiyasida ko‘rikdan o‘tkazish tartibi saqlab qolinadi.

Quyidagilar Universitet faoliyatini moliyalashtirish manbalari etib belgilanadi:

davlat budjeti mablag‘lari;

o‘qitishning to‘lov-kontrakt shaklidan tushgan mablag‘lar;

xo‘jalik faoliyatidan va shartnoma asosida xizmatlar ko‘rsatishdan tushgan tushumlar;

jismoniy va yuridik shaxslarning homiylik va xayriya mablag‘lari;

xalqaro moliya tashkilotlarining grantlari;

qonun hujjatlarida taqiqlanmagan boshqa manbalar.

Moliya vazirligi davlat granti asosida tahsil olayotgan Universitet talabalarini o‘qitish sarf-xarajatlari amaldagi tartibda davlat budjeti tomonidan moliyalashtirilishini ta’minlaydi.

Universitetda budjetdan tashqari (to‘lov-kontrakt) mablag‘lar hisobidan boshqaruv, professor-o‘qituvchilar, ilmiy, o‘quv-yordamchi, texnik va xizmat ko‘rsatuvchi xodimlarni moddiy rag‘batlantirish uchun Maxsus jamg‘arma ularning mehnatga haq to‘lash fondining 200 foizigacha miqdorida tashkil etiladi.

Belgilanishicha:

Maxsus jamg‘arma mablag‘lari shtatdagi boshqaruv, professor-o‘qituvchilar, ilmiy, o‘quv-yordamchi, texnik va xizmat ko‘rsatuvchi xodimlarga tarif stavkasining 200 foizgacha miqdorda har oylik ustamalar belgilashga yo‘naltiriladi;

Maxsus jamg‘arma mablag‘larini shakllantirish va ulardan foydalanish tartibi, shuningdek, Universitet xodimlariga har oylik ustamalar belgilash mezonlari Vasiylik kengashi bilan kelishilgan holda Universitet tomonidan belgilanadi.

Universitet boshqaruv, professor-o‘qituvchilar, ilmiy, o‘quv-yordamchi, texnik va xizmat ko‘rsatuvchi xodimlarga Davlat budjeti hisobidan ko‘p yillik mehnati uchun rag‘batlantirish koeffitsiyentini hisobga olgan holda, lavozim maoshiga belgilangan koeffitsiyentlarda quyidagi hajmlarda har oyda qo‘shimcha pul to‘lanadi: 3 yildan 5 yilgacha — 0,15; 5 yildan 10 yilgacha — 0,2; 10 yildan 15 yilgacha — 0,3; 15 yildan ortiq — 0,4.