Madaniyat va adabiyot rivojiga munosib hissa qo‘shgan atoqli shaxslarning yubileylari keng nishonlanadi

Vazirlar Mahkamasining “Mamlakatimizda ilm-fan, madaniyat va adabiyot rivojiga munosib hissa qo‘shgan atoqli shaxslarning yubileylarini keng nishonlash to‘g‘risida”gi hujjati loyihasi e'lon qilindi.

Madaniyat vazirligi, Oliy va o‘rta maxsus ta'lim vazirligi, Yozuvchilar uyushmasi, Fanlar akademiyasi, Respublika Ma'naviyat va ma'rifat markazi, Teatr arboblari uyushmasi hamda keng jamoatchilikning 2020 yil davomida ma'rifatparvar alloma va jamoat arbobi Mahmudxo‘ja Behbudiy tavalludining 145 yilligi, O‘zbekiston xalq artistlari Olim Xo‘jayev va Soyib Xo‘jayev tavalludlarining 110 yilligi, O‘zbekiston xalq yozuvchilari Said Ahmad, Asqad Muxtor hamda atoqli olimlar Sa'di Sirojiddinov va Ibrohim Hamroboyevlar tavalludlarining 100 yilligi, O‘zbekiston xalq shoiri Jumaniyoz Jabborov tavalludining 90 yilligi, O‘zbekiston xalq yozuvchisi Shukur Xolmirzayev tavalludining 80 yilligi, O‘zbekistonda xizmat ko‘rsatgan madaniyat xodimi, shoir Shavkat Rahmon, O‘zbekiston xalq yozuvchisi Erkin A'zam hamda O‘zbekiston xalq shoiri Usmon Azim tavalludlarining 70 yilligini mamlakat miqyosida keng nishonlash to‘g‘risidagi taklifi qo‘llab-quvvatlanishi mumkin.

Tavallud sanalari nishonlanadigan ijodkorlar va olimlarning yubiley tadbirlarini tashkil etishga tayyorgarlik ko‘rish va uni o‘tkazish bo‘yicha tashkiliy qo‘mita hamda yubiley tadbirlarni keng nishonlash bo‘yicha chora-tadbirlar rejasi tasdiqlanadi.

Tashkiliy qo‘mitaga Tavallud sanalari nishonlanadigan ijodkorlar va olimlarning yubileylarini nishonlash doirasida o‘tkaziladigan tadbirlarni yuksak saviyada tashkil etish, belgilangan chora-tadbirlar sifatli amalga oshirilishini muvofiqlashtirib borish, yuzaga keladigan masalalarni o‘z vaqtida hal etish vazifalari yuklatiladi.

Madaniyat vazirligi, Yozuvchilar uyushmasi, Fanlar akademiyasi, Oliy va o‘rta maxsus ta'lim vazirligi, “O‘zbekkino” Milliy agentligi hamda Qoraqalpog‘iston Respublikasi Vazirlar Kengashi, viloyatlar va Toshkent shahar hokimligi hamda manfaatdor vazirlik va idoralarga Tavallud sanalari nishonlanadigan ijodkorlar va olimlarning yubileylarini nishonlash bilan bog‘liq chora-tadbirlar doirasida:

ma'rifatparvar alloma va jamoat arbobi Mahmudxo‘ja Behbudiy, O‘zbekiston xalq yozuvchilari Said Ahmad, Asqad Muxtorlarning saylanma asarlarini nashrga tayyorlash va chop etish;

tavallud sanalari nishonlanadigan ijodkorlar va olimlarning hayoti va faoliyati haqida hujjatli filmlar va ko‘rsatuvlar tayyorlash va namoyish etish;

ularning adabiy asarlari asosida spektakllar sahnalashtirish, badiiy filmlar yaratish;

mamlakatdagi ta'lim muassasalari, ijod maktablarida taniqli adib va san'atkorlar, olimlar ishtirokida mazkur tavallud sanalariga bag‘ishlangan uchrashuvlar, kitobxonlik kechalari va ilmiy-amaliy konferensiyalar tashkil etish hamda o‘tkazish;

tavallud sanalari nishonlanadigan ijodkorlar va olimlarning yashagan xonadonlarga yodgorlik lavhalari o‘rnatish, Toshkent shahridagi ko‘chalarga ularning nomlarini berish;

tavallud sanalari nishonlanadigan ijodkorlar va olimlarning ilmiy-ijodiy faoliyatiga bag‘ishlangan kechalar va davra suhbatlarini yuqori saviyada tashkil qilish hamda o‘tkazish choralarini ko‘rish topshiriladi.

Samarqand viloyati hokimligi Vazirlar Mahkamasi huzuridagi Prezident, ijod va ixtisoslashtirilgan maktablarni rivojlantirish agentligi Yozuvchilar uyushmasi va Moliya vazirligi bilan birgalikda Samarqand shahrida Mahmudxo‘ja Behbudiy nomidagi ona tili va adabiyot fanini chuqurlashtirib o‘qitishga hamda xorijiy tillarga ixtisoslashtirilgan maktab tashkil etish bo‘yicha taklif ishlab chiqadi va belgilangan tartibda Vazirlar Mahkamasiga kiritadi.

Samarqand viloyati hokimligi, Surxondaryo viloyati hokimligi, Toshkent shahar hokimligi, Yozuvchilar uyushmasi, Madaniyat vazirligi, Badiiy akademiya va Moliya vazirligi bilan hamkorlikda:

Samarqand shahrida ulug‘ alloma va jamoat arbobi Mahmudxo‘ja Behbudiy yashagan uy-muzeyini tashkil etish;

Surxondaryo viloyatida O‘zbekiston xalq yozuvchisi Shukur Xolmirzayev nomidagi ona tili va adabiyot fanini chuqurlashtirib o‘qitishga ixtisoslashtirilgan maktab tashkil etish;

Toshkent shahrida O‘zbekiston Qahramoni, O‘zbekiston xalq yozuvchisi Said Ahmad yashagan uy-muzeyini tashkil etish bo‘yicha taklif ishlab chiqadi va belgilangan tartibda Vazirlar Mahkamasiga kiritadi.

Axborot texnologiyalari va kommunikatsiyalarini rivojlantirish vazirligi tavallud sanalari nishonlanadigan ijodkorlar va olimlarning yubiley tadbirlariga bag‘ishlab ularning siymosi aks ettirilgan maxsus pochta markalarini chiqarish choralarini ko‘radi.