«Daromad 100 mln so‘mgacha bo‘lsa, qat'iy belgilangan soliq to‘lanadi». DSQ xonandalarni soliqqa tortish tartibini tushuntirdi

Uning bildirishicha, 2020 yilning 1 yanvaridan boshlab san'atkorlardan yangicha tartibda soliq undirish joriy etilgan. Mazkur masala so‘nggi 3 yillikda soliq siyosatini takomillashtirish doirasida har yilgi parametrlarda muhokama qilingan.

“Xonandalik faoliyatini amalga oshirishda ruxsatnoma olishdagi davlat boji stavkasi pasaytirildi va ularga soliq to‘lash joriy qilindi.

Soliq rejimi bo‘yicha daromadi 100 million so‘mgacha bo‘lsa, qat'iy [belgilangan] soliq to‘lanadi. Stavka Pensiya jamg‘armasi bilan birgalikda 270 ming atrofidagi summani tashkil qiladi. Xizmat ko‘rsatishdan olayotgan daromadi 100 million so‘mdan oshadigan bo‘lsa, ular aylanma [mablag‘lar]dan soliq to‘lashga o‘tishadi. 

Shu bilan bir qatorda, barcha tadbirkorlik sub'yektlarimizga tegishli. Ular deklaratsiya asosida soliq to‘lashi mumkin. Xizmat ko‘rsatishdan olayotgan daromadi va xizmat ko‘rsatish bilan bog‘liq barcha xarajatlarni chegirib tashlab, o‘ziga qoladigan sof foydasidan 12 foiz soliq to‘lash tartibi joriy qilindi”, - deya Fazliddin Umarovning so‘zlarini keltirmoqda Kun.uz muxbiri.

Avvalroq, san'atkorlardan boshqacha tartibda soliq undirish rejalashtirilayotgani haqida ma'lumot berilgan edi.