O‘zbekiston «Qonun ustuvorligi» indeksida 92-o‘rinni egalladi

World Justice Project xalqaro fuqarolik jamiyati tashkiloti tomonidan yuritiladigan «Qonun ustuvorligi» indeksi bo‘yicha 2020 yil uchun hisobot e'lon qilindi. Unga ko‘ra, O‘zbekiston umumiy reytingda 0.47 ball bilan 92-o‘rinni egalladi.

Moliya vazirligi xabariga ko‘ra, O‘zbekiston «Qonun ustuvorligi» indeksining Tartib va xavfsizlik ko‘rsatkichida yillar davomida ijobiy natija ko‘rsatib kelmoqda (0,9 ball bilan dunyo mamlakatlari orasida 11-o‘rin). 2020 yilda mamlakatning eng katta o‘zgarishi Korrupsiyaning mavjud emasligi ko‘rsatkichida kuzatildi: 0.40 ball bilan 89-o‘rin (2019 yilda 0.38 ball bilan 95-o‘rin).

«Qonun ustuvorligi» indeksi 0 (eng past)dan 1 (eng baland) ballgacha bo‘lgan shkalada baholanib, ularga tegishli reyting beradi. Indeksda davlatlar asosiy 8 omil bo‘yicha tahlil qilinib hamda 44 ta subko‘rsatkichga bo‘lingan: hukumat vakolatlarining cheklanishi, korrupsiyaning yo‘qligi, ochiq hukumat, asosiy huquqlar, buyruq va xavfsizlik, normativ qoida, fuqarolik odil sudlovi hamda jinoiy odil sudlov. 

Indeks World Justice Project tashkiloti tomonidan umumlashtirilgan General Population Poll” (GPP) va “Qualified Respondens’ Questionnaires” (QRQs) katta hajmli savollardan iborat so‘rovnomalariga asoslangan holda baholanadi. O‘zbekistonda so‘rovnoma Toshkent, Namangan va Samarqand viloyatlarida o‘tkaziladi.

Vazirlik izohida aytilishicha, Kosovo va Gambiya 2020 yilgi hisobotiga kiritilganligi sababli umumiy mamlakatlar soni 128 taga yetdi. Natijada, O‘zbekiston umumiy reytingda 4 pog‘onaga yuqorilagan.