Normativ-huquqiy hujjatlar loyihalari muhokamasi portalida “O‘zbekiston Respublikasida radioaloqadan foydalanish qoidalarini tasdiqlash haqida”gi hujjat loyihasi e'lon qilindi.
Qoidalar diplomatik vakolatxonalar va konsullik muassasalari va O‘zbekiston Respublikasi hududidagi ularga tenglashtirilgan chet el davlatlari xalqaro tashkilotlarining vakolatxonalari radioaloqasiga taalluqli emas.
Har bir radioelektron vosita (REV) faqat qonun hujjatlarida belgilangan tartibda radiochastota organlari tomonidan berilgan ruxsatnomalarga muvofiq o‘rnatilishi va ekspluatatsiya qilinishi mumkin.
Radiochastota spektridan foydalanish tartibi O‘zbekiston Respublikasi radiochastota spektridan foydalanishni tartibga solish sohasida ishlarni muvofiqlashtirish bo‘yicha idoralararo kollegial organ hisoblanadigan Radiochastotalar bo‘yicha respublika kengashi (RChRK) tomonidan belgilanadi.
Radiochastota organlari bo‘lib O‘zbekiston Respublikasi Axborot texnologiyalari va kommunikatsiyalarini rivojlantirish vazirligi, Mudofaa vazirligi va Davlat xavfsizlik xizmati hisoblanadi. Radiochastota organlari boshqa vazirliklar, davlat qo‘mitalari va idoralar bilan bir qatorda RChRK tarkibiga kiradi va uning a'zosi hisoblanadi.
Radioaloqa vositalaridan foydalanadigan yuridik va jismoniy shaxslar ruxsat beruvchi hujjatlar rasmiylashtirilganda, radiochastota organi bilan tuzilgan foydalanish shartnomasida nazarda tutilgan radioaloqa vositalaridan foydalanishning belgilangan qoidalariga va shartlariga rioya qilishlari va foydalaniladigan radioaloqa vositalarining radionurlanishga belgilangan normalarga muvofiqligini ta'minlashlari kerak.
Radiochastota organlari radioelektron vositalarni ekspluatatsiya qilish xususiyatlari bilan bog‘liq sharoitlarda, shuningdek alohida radiochastotalardan foydalanish imkoniyati bo‘lganda, belgilangan tartibda ulardan foydalanishni to‘xtatish, to‘xtatib qo‘yish yoki cheklash huquqiga egadirlar.
Radiochastota organlari va Aloqa, axborotlashtirish va telekommunikatsiya texnologiyalari sohasida nazorat bo‘yicha davlat inspeksiyasi radioelektron vositalarni ekspluatatsiya qilishni, ularning belgilangan standartlar va normalarga nomuvofiqligi, fuqarolarning xavfsizligi, atrof-muhitni qo‘riqlash ta'minlamagan holda, shuningdek alohida holatlarda belgilangan tartibda taqiqlashlari mumkin.
RChRK qonun hujjatlarida nazarda tutilgan hollarda vaqt va (yoki) hudud bo‘yicha radiochastota spektridan foydalanish huquqini to‘xtatib qo‘yish yoki cheklashga ham haqlidir.
