Koronavirus: O‘zbekistondagi barcha ta'lim muassasalari karantinga yopiladi

16 martdan boshlab O‘zbekistondagi barcha bog‘chalar, maktablar va oliy ta'lim muassasalari koronavirus tarqalishiga qarshi profilaktika maqsadida karantinga yopiladi. Bu haqda O‘zbekiston bosh vaziri Abdulla Aripov koronavirus mavzusiga bag‘ishlangan brifing chog‘ida ma'lum qildi.

Kun.uz manbasi xabar qilishicha, ta'lim muassasalaridagi karantin uch haftagacha davom etishi ko‘zda tutilgan, vaziyatga qarab muddat uzayishi ham mumkin.

Eslatib o‘tamiz, bugun, 15 mart kuni O‘zbekistonda koronavirusga chalingan ilk bemor aniqlandi. U 11 mart kuni Fransiyadan qaytgan, u bilan bir reysda bo‘lgan yo‘lovchilar va ekipaj a'zolari tibbiy nazoratga olingan, bemorning oila a'zolari va u bilan aloqada bo‘lgan boshqa kishilar izolyatsiya qilingan.

Bundan avvalroq Kun.uz manbasi koronavirus tufayli O‘zbekistondagi barcha maktabgacha ta'lim muassasalari vaqtincha yopilishi haqida xabar bergandi.

• 15 mart holatiga ko‘ra, butun dunyoda 120dan ortiq mamlakatda jami 157 197 kishida koronavirus aniqlangan, hozirgacha ularning 75 940 nafari sog‘ayib ketgan, 5839 kishi vafot etgan.
• Virusdan eng ko‘p jabrlangan davlatlar Xitoy (80844 holat, 3199 o‘lim), Italiya (21157 holat, 1441 o‘lim), Eron (12729 holat, 611 o‘lim), Janubiy Koreya (8162 holat, 75 o‘lim), Ispaniya (6391 holat, 196 o‘lim), Germaniya (4599 holat, 9 o‘lim), Fransiya (4469 holat, 91 o‘lim), AQSh (2982 holat, 60 o‘lim), Shveytsariya (1375 holat, 13 o‘lim), Buyuk Britaniya (1140 holat, 21 o‘lim) va Norvegiya (1109 holat, 3 o‘lim) bo‘lib qolmoqda.