Bog‘cha uchun qilingan to‘lov karantindan so‘ng qayta hisoblanadi - Vazir

Maktabgacha ta'lim vaziri Agrippina Shin karantin davri uchun maktabgacha ta'lim tashkilotiga qilinadigan to‘lovning hisoblanish tartibiga izoh berdi.

«Karantin davrida bolaning maktabgacha ta'lim tashkilotiga qatnamaganini inobatga olgan holda, keyingi oy avvalida to‘lov masalasi qayta hisoblab chiqiladi», dedi Agrippina Shin.

Shuningdek, karantin davrida MTT metodistlarining ishga chiqishda davom etishi zaruratiga oydinlik kiritildi.

«Metodist mudir bilan birgalikda karantin davrida ota-onalar uchun tushuntirish ishlarini olib boradi. Ta'til vaqtida bolaning vaqtini qanday to‘g‘ri tashkil etish bo‘yicha savollar tug‘ilishi tabiiy, bunda metodist maslahati kerak bo‘ladi.

Shuningdek, MTT mudiri va metodisti ish davrida jamlanib qolgan yumushlarni bajarishlari mumkin bo‘ladi. Ishning huquqiy masalalari, qog‘oz ishlari jamlanib qolgan. Bular asosiy ishdan tashqari vaqt talab etadi. Hozir shu kabi ishlarni qilib olish, tizimga yangi g‘oya va rejalar kiritish haqida o‘ylash uchun qulay vaqt», dedi Agrippina Shin karantin davrida MTTlar faoliyatini tashkil etish masalasiga bag‘ishlangan brifingda.

Brifingda ma'lum qilinishicha, karantindan so‘ng nafaqat davlat, balki xususiy maktabgacha ta'lim tashkilotlarida ham hududiy sanitariya-epidemiologiya markazlari tomonidan dezinfeksiya choralari ko‘rilishi tashkil etiladi.